Ang unang Sinulog sa Sugbo

Sinulog sa Sugbo. Mao ni ang cover title sa 1980 Souvenir Program sa unang pasundayag-publiko sa Sinulog nga diha ra sayaw-sayawa sa mga tindera og kandila atbang sa simbahan sa Sto. Niño de Cebu.

Hinumdoman nga ang unang Fiesta Señor dinhi sa dakbayan, gisaulog niadtong Abril 28, 1566, first anniversary sa pagkakaplag ni Juan Camus sa imahen ni Sto. Niño.

Ug niining tungora, there was a jubilant celebration, matud pa, diin ang mga lumad nagsayaw-sayaw dala ang pangaliya ug mikamaykamay sa ilang mga kamot sa ilang kahimuot pagsud-ong sa imahen ni Sto. Niño.

So, dugay na gyud kaayo kining atong pagsaulog sa Fiesta Señor ug kining atong pag-Sinulog. Nalipay kita nga nagpadayon kini hangtud karon. Ug atong namatikdan nga nagkadaghan ang mga batan-on ang nagpakita sa ila usab nga debosyon sa Balaang Bata.

Ang unang Sinulog festivities (dili 1981), gipasiugdahan sa Ministry of Youth & Sports Development; The Augustinian Community; Confradia del Santo Niño de Cebu, in coordination with the City Government of Cebu, Association of Regional Executives of National Agencies in Region 7 (ARENA 7), ug Rotary Club of Talisay.

Ang mga mihatag sa mensahe mao sila si David S. Odilao Jr, director sa MYSD ug amahan sa Sinulog; Gov. Eduardo R. Gullas; City Mayor Florentino Solon; Rev. Fr. Medardo Durmiendo, OSA, Rector sa Basilica del Santo Niño de Cebu; Mrs. Josefina R. Gullas, presidente sa Confradia del Santo Niño de Cebu.

Walo ka tunghaan ang misalmot sa Sinulog sa Sugbo ’80, ang Cebu Central Colleges, Cebu Institute of Technology, Cebu School of Arts & Colleges, Colegio de San Jose Recoletos, Southwestern University, University of San Carlos, University of Southern Philippines ug University of the Visayas.

Ang executive committee sa Sinulog sa Sugbo 1980, gilangkoban nila ni Mayor Solon, honorary chairman; Odilao, chairman; ug mga miyembro: Fr. Durmiendo, Josefina Gullas, Director Francisco Arnado, Atty. Leonardo Manlosa. Ang over-all choreographer si Myhc Gonsalez, giabagan ni Jesus Labrador, for synchronization. Mga historical researcher sila si Domingo Estabaya, Resil Mojares ug Virgilio de la Victoria.

Duha ra ka adlaw ang kasaulogan: January 19, 1980 – Holy Vispers, procession sa imahen ni Sto. Niño, 4:00 pm, ug sa January 20, 1980 – Kahulogan sa piyesta – 8:00 am, Solemn High Mass nga gisaulog sa mga Augustinian Recollect Fathers sa CSJ-R, diin ang tanang misalmot sa Sinulog sa Sugbo, mitambong sa Santos nga Misa.

There you are niining atong pagpakli sa kagahapon, sa unang Sinulog sa Sugbo - 1980.