Ug sa dihang nagbisyo ang akong multicab

Pagpamalandong sa Malangkubong kaayohan

Kusog ang bunok sa uwan, padung na unta ko sa Tabuelan kay mangita og internetan. Apan unsang pagka unsaa nga daw sa gitapol ang akong sakyanan nawad-an og kusog dayon napawong na lang sa dayon. Kuyog nako si Faith ug akong gipasakay balik sa Mohon aron mangita og rescue kay awaaw ang maong dapit ug may schedule pang nag-ung ong sa alas siyete. Tuod man niabot ang rescue aron mapaandar og balik ang multicab. Salamat ni konsehal Jojo Tapere sa Cabangahan ingon man  sa iyang mekaniko nga niadto. Gikubikubi na gyud unta ang multicab sa dihang may nihagiyos. Usa ka pamilyahan nga luwan sa motorsiklo ang nalamba diha gyud sa among tungod. Nisiyagit ang asawa ug nakuyapan ang ilang anak. Akong giingnan ang konsehal ipauna lang una kini sila og hatud didto sa tambalanan sa Tabuelan kay basin unya og magrabehan. Nakapamalandong ko sa hilom. Mas maayo ra pud nga naguba kining akong sakyanan kay mamahimong saksi sa disgrasya sa kadalanan ug di lang kay nahimong saksi nakatabang pa sa mga hingtungdan. Awaaw baya ang maong dapit. Sa akong pag-inusara didto sa wala pa ang disgrasyang nahitabo namasin ko nga may dwende o dili ba kaha Master Yoda nga motunga aron himoon ko niyang padawan hulip ni Anakin o di ba kaha ni Luke niadtong mamingaw nga dapit sa Gumbang Tabuelan. Ang mensahe mao: “Daghang surprisa ang kinabuhi usahay dunay mga butang nga di na kinahanglang himoan og plano aron lamang ma-appreciate mo ang kaanindot sa kinabuhi ug kahilom.