Lantugi sa Federalismo
Usa ang Sugbo sa mga dapit gawas sa Senado nga labing una nga pahigayonan sa public hearings mahitungod sa panginahanglan sa pag-usab sa 1987 Constitution nga gisugdan sa Senate Committee on Constitutional Amendments and Revision of Codes niadtong Miyerkules, Enero 17.
Wa pa hinuon matakda ni Senador Kiko Pangilinan, ang pangulo sa komitiba, kanus-a mangonsulta ang mga senador sa mga eksperto sa Konstitusyon ug sa mga representante sa nagkalainlain nga sektor sa Sugbo ug uban nga bahin sa nasud.
* * *
Matud ni Senador Bam Aquino, ang tanan nga testimoniya nga ilang makuha sa public hearings, hukngayon sa komitiba nga mao sab ang mohukom kon pilian ba o ipunon ang daghan na nga resolusyon sa charter change (cha-cha) nga gipasaka sa mga senador.
Nipasabot si Aquino, atol sa Arangkada sa DYAB Abante Pa, Bisaya! nga nauyonan nila ang pagsunod sa proseso bisan pa sa pag-apura sa mga kongresista nga mag-ipon na sila isip Constituent Assembly (con-ass) aron nga masugdan na dayon nila sa pagtuki ang mga probisyon sa 30 ka tuig na nga batakan nga balaod nga kinahanglan nga usbon.
* * *
Apan bisan sa pasidaan ni Senador Ping Lacson nga palagputon ang mga senador nga motambong sa con-ass sa mga kongresista, gihingusgan ni House Speaker Pantaleon Alvarez ang iyang panungog:
Niinsistir nga moipon ang mga senador sa mga kongresista alang sa hiniusa nga sesyon ug botasyon; ug
Nipasidaan nga mag con-ass na bisan wa’y mga senador kay nakuha na nila ang sobra sa 240, ang ¾ sa 320 (297 ka kongresista ug 23 ka senador), nga maoy gikinahanglan pagsugod sa con-ass.
* * *
Nisugyot si Aquino nga sa dili pa magharab-harab sa cha-cha ang mga kongresista, ilang paminawon ang awhag sa mga eksperto sa PDP Laban Federalism Institute nga unahon ang duha ka batakan nga panginahanglan sa dili pa mapabarug ang federal nga sistema sa gobiyerno:
Pagpasar og balaod batok sa politikanhon nga mga dinastiya aron nga dili gawongan lang gihapon sa gamhanan nga mga pamilya ang bag-o nga sistema; ug
Pagpalig-on sa ekonomikanhon nga kahimtang sa labing kabus nga mga rehiyon aron nga andam na sila nga mobarug isip buwag nga federal states.
* * *
- Latest
