Press Freedom ug lagda sa patigayon

Daghan ang nahingawa sa desisyon sa Securities and Exchange Commission pagpasirado sa Rappler tungod sa giingong kalapasan niini sa Constitution.

Usa sa mga nisantop dayon sa hunahuna, mao ang daw sa inanay nga pagbalik sa diktadorya.

Ang Section 11 Article XVI sa atong  batakang balaod nagmando nga ang media organization kinahanglang 100 percent nga panag-iyahon sa mga Pilipino.

Tumong niini aron malikayan ang inpluwensiya sa mga langyaw sanglit ang media giisip nga gamhanan tungod sa dakong papel niini pag-umol sa public opinion nga mahimong makaapekto sab sa mga palisiya sa gobiyerno sa daghang aspeto, lakip na sa ekonomiya.

Ang mga opisyal sa Rappler, pinangulohan sa beterana ug respetadong journalist nga si Maria Ressa, miangkong usa sa ilang mga investors mao ang founder sa eBay nga si Pierre Omidyar, pinaagi sa kompaniya niini nga mao ang Omidyar Network.

Tungod kay gidili lagi sa balaod ang direktang investment sa mga langyaw diha sa industriya sa media, ang investment gihimo pinaagi sa usa ka Philippine Depository Receipt (PDR).

Daw sama ni sa shares of stocks nga giisyu sa Rappler ngadto sa ilang investor, apan matud sa mga opisyal sa kompaniya nga wa’y labot sa operasyon ang ilang investor.

Nagpabilin kuno gihapon nga 100 percent ang ilang kompaniya bisan duna sila’y langyaw nga naghatag og puhonan. Kini maoy ugat sa problema sa Rappler nganong gipasirad-an sila sa SEC.

Karon matud sa Rappler nga ang nahitabo maisip nga usa ka pagpangatake sa gobiyerno sa kagawasan sa prensa. Gigukod kuno sila ni Presidente Rodrigo Duterte tungod sa ilang pagsulti sa tinuod.

Alang nako insulto ni sa ubang media organization. Buot ba nilang ipasabot nga ang uban nga wala pasirad-i, wala magtug-an sa tinuod? Atong hinumdoman” there is no absolute freedom.” Ang nahitabo usa ka “corporate issue” ug wa’y labot ang press freedom.