Ang termino sa president

Giaprobahan na sa Kongreso ang resolusyon nga nagpatawag og usa ka Constituent Assembly, aron usbon ang sistema sa gobiyerno sa Pilipinas, gikan sa Presidential ngadto na sa pagka Federal.

Ang giaprobahang resolusyon ipadala kini ngadto sa Senado aron mapalabang usab ang susamang tumong. Kon suportahan sa Senado ang pagpatawag og usa ka Constituent Assembly, mura’g duol-duol na sa tinuod ang gusto sa presidente nga Federalismo.

Ang Constituent Assembly mao kini ang usa sa paagi pag-usab sa Batakang Balaod, diin ang mga sakop sa Kongreso mag-usa sa pagtigum aron tukion ang sugyot nga paghimo’g kausaban sa mga lagda.

Sa paghimo sa mga sakop sa Kongreso nga Constituent Assembly, madoble na ang trabaho niini kay samtang Constituent Assembly kini, magpabilin usab kini nga magtrabaho isip Kongreso.

Kon ako lang, mas maayo nga usbon ang Batakang Balaod pinaagi sa Constitutional Convention. Sa Con-Con gud makapaabot kita og de-kalibre nga batakang balaod kay ang naghimo niini, dili linga, kay mao ra man gyud kini ang ilang trabaho.

Sa Constitutional Convention layo ra ang posibilidad nga masulod ang personal nga interest sa mga politiko pag-usab nila sa Batakang Balaod kay dili mga politiko ang naghimo niini. Mao ni ang mga bentaha kon Con-Com ang paagi sa pag-usab sa atong Konstitusyon.

Usa sa gisugyot nga usbon sa atong Batakang Balaod mao ang termino sa presidente nga unom ka tuig. Gusto kining usbon ngadto sa lima na lang ka tuig, apan itugot nga makapapili pag-usab. Wala na usab unya ang opisina sa bise presidente kay wagtangon na kini.

Sa sugyot nga kausaban, ang presidente mahimo na unya nga head of state, samtang aduna na pud unya’y primero ministro nga maoy magsilbe nga head of government. Kamo uyon mo niini?