Kamingaw sa Fuente

Karong Domingo na man diay ipahigayon ang Sinulog, apan mora man og mingaw karong mga panahona, ilabi na sa may uptown area. Inig-agi gani nako sa Fuente Osmeña matag gabii gikan sa opisina sa downtown area, maihap lang sa tudlo ang magtikawtikaw sulod sa mao nga park.

Mora ko og nabag-ohan sa sitwasyon karon. Sa niaging mga tuig, entrada pa lang sa Pasko, haskang biboha na sa uptown area, ilabi na diha sa Fuente Osmeña.

Daghang mosulod sa circle gumikan lagi sa mga atraksiyon ug ubang kalingawan nga halos ipahigayon matag gabii.

Apan tungod niining order ni Mayor Tomas Osmeña pagbalhin sa kalingawan didto sa Plaza Independencia, mingaw pa sa tirana ang Fuente Osmeña karon.

Ang kaniadto puno sa kasadya gikan sa pag-arangkada pa lang sa Pasko hangtud na sa adlaw sa Sinulog, nakabsan na sa pagsidlak.

Taliwala sa masulob-ong palibot, bugtong ang higante nga Christmas Tree na lang ang pabiling naghari diha sa maong circle. Gituyo kana pagpabarug sa usa ka ilado nga lokal nga kompaniya aron lagi pagduyog sa kasadya nga matag tuig nga mosakdap diha sa Fuente Osmeña.

Apan karon menos na ang mosulod sa circle ug magpahulagway uban niini. Kini tungod usab kay pipila lang ang mobisita sa circle aron sa paglingawlingaw.

Adunay duha ka dekorasyon ang naandang i-display gawas sa circle. Apan sama gihapon, gamay lang usab ang magpahulagway niini.

Kini ang hinungdan ngano nga adunay pipila ka negosyante palibot sa Fuente Osmeña nga mireklamo tungod kuno kay menos na ang ilang kita tungod sa pagbalhin sa mga kalingawan diha, ngadto na sa Plaza Independencia. Sila naglaum nga dili na unta kini mahitabo sa sunod tuig.

Ambot kon unsa’y naghapak sa mga sampot sa mga opisyal diha sa City Hall nganong nakadesider man sila pagbalhin sa kalingawan matag gabii sa Fuente Osmeña ngadto sa Plaza Independencia.

Dili ikalimod nga tuyoon ang Plaza gawas nga peligro usab ang siguridad sa katawhan panahon sa kagabhion.

Kay nasugdan na man kini didto sa Plaza Independencia, mora’g padayon na kini nga adto ipahigayon ang maong kalingawan matag tuig, ug alaot na ang Fuente Osmeña tungod kay magpadayon usab kining dulom panahon sa Sinulog bisan pa man kon sentro kini sa komersiyo sa uptown area.