Paglingla sa mga konsumedor

Unang suweldo karong adlawa niining bag-ong tuig. Dili ikalimod nga daghan gayud ang magmaya karon, ilabi na niadtong nga minimum wage earner sa nasud, tungod kay wala na unya sila’y deduction sa ilang personal income tax gikan sa kagamhanan.

Ilalum sa Tax Reform for Acceleration and Inclusion (TRAIN) Law nga miepekto sugod karong bulana, wala na’y buhis nga kuhaon ang kagamhanan gikan sa mga trabahador sa tibuok nasud nga adunay income nga dili molapas sa P250,000 matag tuig.

Hinuon, kinsa ba’y dili magmaya niana? Kini tungod kay modako na man unya ang purchasing power sa mga Pilipino ug maka-afford na sila og gasto alang sa ilang pamilya. Tungod niana, mosaka usab ang atong ekonomiya tungod sa nagkadako nga public spending.

Apan daghan usab ang nabalaka sa pag-arangkada sa TRAIN Law. Gumikan lagi sa rason nga midako na usab ang buhis sa lana, industriya sa sakyanan ug uban pa. Sigurado gayud kuno nga mosulbong usab ang presyo sa mga basic commodities.

Gani, pipila lang ka adlaw pagsulod sa bag-ong tuig, adunay daghang taho nga misaka na ang mga presyo sa mga nag-unang palaliton. Dako na kuno ang pagsaka sa presyo sa mga soft drinks, utanon, isda, karne, bugas ug uban pa, ikumpara sa wala pa miepekto ang TRAIN Law.

Nagpasabot lang kini nga daghan na nga mga negosyante ang mi-take advantage sa maong balaod. Paglingla sa mga konsumidor ang ilang gibuhat. Kini tungod kay kanang mga produkto nga ilang gibaligya karon, wala pa kana maapektohi sa TRAIN Law ug nga dili angay nila nga patas-an ang presyo.

Angay nga mohimo og daling aksiyon ang kagamhanan niini, ilabi na ang Department of Trade and Industry. Angay lang nga gukdon sa maong ahensiya kining mga wala’y puangod nga mga negosyante nga grabe ka mapahimuslanon.

Angay unta nga gipangandaman sa DTI ug ubang ahensiya sa gobiyerno ang TRAIN Law. Subay sa pag-epekto niini, subsob usab unta ang ilang monitoring sa sektor sa pamatigayon aron pagkontrol sa presyo sa mga nag-unang palaliton.