Trapik sa probinsiya

Dili lang sa Metro Cebu nasinati ang grabe nga kahuot sa trapiko, kon dili, hasta na diay sa probinsiya.

Niadtong Sabado, nibiyahe kami paingon sa habagatang bahin sa Sugbo, diin nahimutang ang kastilyo sa Mahal nga Birhen Maria sa Simala-Lindogon, Sibonga.

Apan pag-abot namo dapit sa lungsod sa San Fernando, hilabihan gyud kahuot sa karsada sa mga sakyanan ug hinay ang dagan niini hangtud na sa dakbayan sa Carcar.

Gumikan kini sa road repair dapit sa Barangay Perrelos, Carcar City, diin usa ra ka ‘lane’ sa karsada ang gipaagian. Sa pag-uli namo, misamot kahuot ang traffic, diin miabot na sa Sibonga ang kutay sa mga sakyanan gikan sa habagatan.

Halos lima ka oras ang pagkatanggong sa mga motorista usa kini nakalabang sa giayo nga karsada. Alas kwatro sa hapon kami nigikan sa Sibonga, alas nuybe na sa gabii nakalingkawas sa traffic dapit na sa San Fernando. Samtang ang mga pasahero usab, nangatanggong sa Cebu South Bus terminal, kay wala man makalusot ang mga bus gikan sa habagatan.

Wala’y sistema sa traffic ang gipatuman sa nagpasiugda sa road repair. Basta makapadayon sila sa ilang trabaho, bahala na nga mangabuang sa trapik ang mga motorista.

Unta mapangitaan kini og pamaagi sa DPWH kay dili man mapugngan ang trabaho nila kay kinahanglan man gyud sab nga makab-ot ang project completion, apan kon tun-an nila ang pamaagi nga dili mabug-atan ang mga tawo, mas maayo.

Resulta na usab kini sa nagkadaghan nga mga sakyanan dungan sa paglambo sa kalungsoran ug dakbayan sa habagatan.

Kinahanglan na gyud nga palapdan ang karsada bisan og kinsa pa ang mobabag niini, kay lagi maapektohan kuno ang mga punoan sa Acasia daplin sa karsada.

Apan, hangtud kanus-a? Ang makatubag kadto lang mga lider nga adunay political will pagpatuman sa programa nga makaayo sa kinabag-an.