Equal Opportunity

Kini ang gipakigbisogan sa tanan nga sektor nga mahatagan og patas nga pagtagad sa atong katilingban. Sama sa mga Persons with Disability (PWD) nga nagtrabaho, ma publikong buhatan o pribadong kompaniya.

Nahimamat nako ang mga differently-abled employees sa Lapu-Lapu City Hall, nga naglakip sa mga amang ug mga bakol ug uban pa nga mga adunay disabilities.

Ang kakulangan nila maoy ilang gigamit sa pagpuno sa ilang determinasyon nga mohimo sa responsibilidad nga gisangon kanila.

Kon unsay mahimo sa uban nga mga kawani, mahimo usab nila o malabwan pa gani, ilabi na sa ilang kakugi.

Admitido ang mga PWD employees nga limitado ang ilang lihok tungod sa physical condition nila, apan gipangitaan nila kini og pamaagi aron makahatag og katagbawan sa katawhan nga ilang giserbisyohan.

Adunay kahugpongan ang mga differently-abled employees sa City Hall, nagpasabot kini nga gipalig-on pa nila ang ilang grupo diin misandig sila sa usa’g-usa.

Ang equal opportunity kabahin kini sa good governance program ni Mayor Paz Radaza, kinsa mihatag og luna sa mga PWD sa tanang mga buhatan sa Lapu-Lapu City Hall.

Dili lang ang dakbayan sa Lapu-Lapu ang adunay programa sama niini, ang Cebu City Hall aduna usab.

Inig sakay nato sa elevator sa City Hall building, timbayahon kita sa ilang elevator operator nga PWD.

Sa mabuot nga katilingban patas kitang tanan, mag-unsa man kon kompleto ang imong lawas apan walay nahimo kay tapolan og oras lang ang bantayan.

Ang tinuod nga serbisyo dili lang sa lawas, kon dili, sa kasing-kasing ug dedikasyon sa paghimo sa iyang gimbuhaton.