Kagubot menosan

Mamenus-menos ang kagubot dinhi sa dakbayan sa Sugbo atol sa pagpahigayon sa Piyesta Señor ug sa Sinulog Grand Parade karong Enero 21, kon hingpit gyud nga mapatuman ang pagdili sa pagbaligya ug ang pag-inom og ilimnong makahubog duol sa rota sa parada.

Aw, masuwayan gyud nato kon tinud-on ba ni Mayor Tomas Osmeña ang iyang bahad nga ipaslak niya sa temporaryo nga detention facility kadtong masakpan nga dili motuman sa iyang kamandoan. Adunay mga karaan nga Kaoshiung buses nga ipahiluna duol sa parade route nga maoy gamiton isip temporaryo nga prisohan.

Apan unsa kaha kon ang usa ka tawo, adto maghubog sa iyang balay nga lapas na sa 300 metros ang gilay-on gikan sa rota sa Sinulog route nga maoy gidili sa mayor? Tingali bisan og nakainom kini nga mosaksi sa mga Sinulog dancers, dili sila dakpon basta dili lang maghinubog.

Kaniadto gud, nakasaksi gyud si Mayor Osmeña nga dunay daghang mga tawo nga nanag-inom og ilimnong makahubog sa mga tindahan diha sa Juan Osmeña.

Ang maong mga imnanan, nasulod pa sa 300 metros gikan sa General Maxilom Avenue, sa ato pa, gidid-an sila sa pagbaligya ug sa pagpainom.

Unya, apil sab nga gidili ang paggamit sa mga parking area sa mga building daplin sa rota sa Sinulog nga gamiton sa negosyo.

Kon makakita gani mo niini, i-report dayon sa mayor pinaagi sa iyang 0917-3279999, ug mahimo usab nga ipaagi kang Konsehal Dave Tumulak, ang deputy mayor for peace and order.

Hinoon, kami nga mga sakop sa media nga nadestino sa City Hall, gi-deputize me nga motabang sa pagtan-aw kon hain sa mga balay patigayon nga wala motuman sa kamandoan sa mayor.

Unom ka buwan nga pagsirado sa tindahan kon masakpan nga kini namaligya ug nagpainom og ilimnong makahubog. Timan-i ninyo, bisan og ang pagbaligya anaa pa sulod sa inyong mga tindahan nga dili makita sa gawas, kalapasan gihapon sa lagda.

Atong abagan si Mayor Osmeña aron dili gubot ang pagpahigayon nato sa Sinulog. Kinahanglan nga kitang tanan mag-inabtik sa pagbantay sa mga tawo nga katahapan ang linihokan aron i-report nato sa mga polis.

Ang isyu karon kon pagngon ba kaha, o dili, sa mga tinugyanan sa kagamhanan ang mga cell sites sa lainlaing telecommunications companies, pareho sa miaging tuig?

Para kanako, ayaw lang uy kay lisud kaayo nga walay kontak. Nagdala ta og cellphone apan dili magamit. Bisan pa og pawong ang mga cell sites, ang mga terorista makahimo gihapon sa pagpamomba kon ila gyud nga tinguhaon.