Hulga sa demokrasya

Taliwala sa dakong hulga sa demokrasya sa nasud human gitug-an ni House Speaker Pantaleon Alvarez nga posibleng wa’y eleksiyon sunod tuig, gisuwayan og hupay ni presidential spokesperson Harry Roque ang kahingawa sa mga mahigugmaon sa demokrasya pinaagi sa pasalig nga dili gusto si Presidente Rodrigo Duterte nga wa’y eleksiyon.

Apan taliwala sa pasalig nga gusto ang presidente og eleksiyon, giangkon ni Roque nga dili sab imposible nga wa’y mahitabong piniliay. Matud ni Roque nga kon mahinayon ang pag-usab sa Batakang Balaod ug mahuman ang pag-ratify niini sa dili pa ang eleksiyon sunod tuig, wa na’y eleksiyon nga mahitabo.

Kon wa’y piniliay, nagpasabot ni nga malugwayan ang termino sa mga naglingkod karon nga mga opisyal, ug wa na ta’y kasiguroan kon mokanaog pa ba sila sa pwesto. Hinoon mag-agad ni unsa’y malatid sa bag-ong Constitution.

Apan dili gyud imposible nga usa sa mga probiso sa Batakang Balaod nga tangtangon kon duna may amendments, kon kausaban nga pagahimoon, mao ang paglibkas sa term limits.

Atong hinumdoman nga ang mo-usab sa atong Batakang Balaod, sila ra pud nga mga kongresista ug senador nga gipaabot nga mo-convene sa dili madugay ngadto sa usa ka constituent assembly.

Sulod ning semanaha, gipaabot nga moduso na og resolution ang Senado aron maghatag og agianan sa constituent assembly. Ang Kongreso duna na’y nag-ung-ong nga resolution mahitungod niini.

Karon ang pangutana, tinuod kaha nga si Duterte gusto gyud nga duna’y eleksiyon sunod tuig?  Sa akong tan-aw gi-drama ta sa Malacañang.

Ang tinuod si Duterte dili sab gusto nga may eleksiyon nga mahitabo. Imo ni’ng makita diha sa mga lihok sa iyang kaalyado sa kongreso, labi pa ni Alvarez nga gustong dalion gyud ang pag-usab sa Constitution ug kinahanglang mahuman ang ratification sa dili pa ang 2019 elections.

Hinuon, ang lain niyang alyado nga si Senate President Koko Pimentel, gusto nga sunod tuig na himuon ang plebisito. Apan sayod sab ta nga posibleng apil ni sa drama tungod kay nahibawo sila nga didto unya sa Constituent Assembly, wa’y mahimo ang mga senador tungod kay lupig man sila sa gidaghanon sa mga kongresista inig-abot sa botasyon.