Fuel subsidy sa TRAIN
Nadapit ang pagtagad sa transport groups sa pasalig ni Finance Secretary Sonny Dominguez, ang kinakusgan nga sakop sa gabinete ni Presidente Rodrigo Duterte ug ang tinuod nga utok sa Tax Reform for Acceleration and Inclusion (TRAIN), nga dili kinahanglan nga umentohan ang plitehan sa mga sakyanan nga pamasahero bisan sa nag-ung-ong nga dako nga usbaw sa presyo sa mga produkto sa lana tungod sa Excise tax sugod sa sunod semana.
Nagsusi sila og dugang detalye sa pahibawo ni Dominguez nga P900 milyones nga fuel subsidy nga i-apud-apod isip fuel vouchers.
* * *
Wa magtagad si Dominguez sa paghatag og dugang katin-awan gawas sa pagtataw nga wa pa kinahanglana ang pag-apud-apod sa fuel vouchers sa pagka karon. Ug kon gikinahanglan na, ang Department of Transportation (DOTr) ug Land Transportation Franchising and Regulatory Board (LTFRB) ang mopatuman sa subsidy.
Apan ang kadagkoan sa DOTr ug LTFRB wa pa sab makaumol sa mga lagda unsaon sa pag-apud-apod ang fuel vouchers. Madawat ba sa tanan, o pinili lang nga mga drayber sa mga sakyanan nga pamasahero, sama sa public utility jeepneys (PUJs), taxis, buses ug tricycles?
** *
Wa katabang sa pagpatin-aw sa kalibog sa transport groups ang opisyal nga kopya sa TRAIN Law nga napasar sa Kongreso ug napirmahan ni Presidente Duterte sa niagi nga buwan: Mubo ra ang hisgot ug utro sab nga wa’y detalye unsaon sa pagpanghatag sa fuel vouchers.
Makapabalaka hinuon ang tugon sa Republic Act No. 10963 kinsa ang hatagan sa subsidy nga gipasigarbo ni Dominguez: “...granting fuel vouchers to qualified transport franchise holders.”
* * *
Nagpasabot ba nga ang operators ug dili ang mga drayber ang hatagan sa fuel vouchers? Kon ipaagi sa operators, unsa man ang garantiya nga moabot sa mga drayber nga mao ang tinuod nga nagkinahanglan sa hinabang?
Wa’y problema ang transport operators nga matinud-anon nga nitabang sa ila nga mga drayber. Apan unsa man intawon ang dag-anan sa mga drayber kansang operators nag-operate sa ila nga kaugalingon ug mas mahal nga gasoline station, nidili sa mga drayber sa pagpatubil sa uban nga mas barato nga gasoline stations ug determinado nga nangilkil pinaagi sa makalilisang nga abangan ug uban nga mga raket?
- Latest
