Sakayan nga kahoy gidili na

Natanggong ang mga biyahedor paingon sa Olango Island ug ubang mga isla, ilabi na kadtong mga nagsalig lang sa gagmay’ng sakayan o depasahero nga pumpboat nga ginama lang sa kahoy. Wala diay kakuha og passenger safety certificate ang mga pumpboat operator sa rota paingon sa isla ug mainland sa dakbayan sa Lapu-Lapu.

Kini gumikan kay wala sila nakatuman sa mga rekisito nga gimando sa Maritime Industry Authority (MARINA) nga kinahanglang ilisan na og puthaw ang mga dapat sa sakayan nga gamiton isip passenger vessel sa mga isla.

Sugod niadtong Enero 1, gipatuman na sa MARINA ang Memorandum Circular nga naumol niadtong tuig 2016 nga did-an na sa pagdala og mga pasahero ang mga sakayan nga ginama sa kahoy.

Tumong niini mao ang paglikay sa mga aksidente sa kadagatan nga mosangpot sa kamatayon sa mga pasahero. Busa gisugdan na unta kini sa pagpatuman sa Coast Guard niadtong nakalabay’ng semana nga misangpot sa pagkatanggong sa mga tawo.

Maayo na lang gani kay nahatagan og special permit ang mga operators ug nakabalik na sa pagbiyahe. Gipadayag ni MARINA Region-7 Director Venancio Verol nga gihatagan nila og kahigayonan ang mga operators sa Olango Island nga maka-comply sa rekisitos alang usab sa tawhanon nga konsiderasyon sanglit wala may laing kasakyan ang taga isla. Apan kon adunay laing operator nga mosulod sa island route nga makatuman sa safety standards sa MARINA, automatic nga ipahunong gyud ang mga kahoy nga sakayan. Sumala sa usa ka operator sa isla nga mahal kaayo ang pagpabuhat og lantsa kay moabot sa P15 million ang usa ka sakayan.

Wala sila’y mahimo gawas sa pagsunod sa lagda kay kon dili, mohunong gyud sila tungod kay karon pa lang gani, daghan na kuno nga mga operators ang nagtinguha nga mosulod sa rota sa isla. Samtang gitataw sa MARINA nga wala’y labot sa circular ang mga sakayan nga gigamit sa pagpangisda ug sa mga turista.