Remedyo sa nangugang panit (3)

Aloe Vera Gel — Nagbaton kini og kabugnaw nga manuhotsuhot sa atong panit, nga usa sa maayong pang-umog (moisturizer) nga gikan sa tanom. Labing maayo usab kini nga remedyo para sa grabeng mga problema sa panit, sama sa nag-uga nga nagdiyong lang nga wa’y kinabuhi.

Matud pa ni Phylis A. Balch, sa Prescription for Natural Healing, epektibo kini sa panit, labi na og kahup-akon nga mura’g nagluno, o himbison. Ibalik sa aloe vera ang kahimsog sa atong panit nga presko ug hamis tan-awon. Inanayon niini ang unang latag (layer) sa panit hangtud sa ilawom, buhion ang mga selyula sa panit.

Butangan ang panit og 100% nga puro nga laputlapot nga unod sa dahon sa aloe-vera. Dili na kinahanglan magbanlaw, apan kon may namilit pa nga lama sa panit, sulod sa 20 minutos, mahimo nga banlawan og init-init nga tubig. Buhata kini kaduha sa usa ka adlaw, o kaha himuon nimo kini nga regular nga moisturizer. Ang panit mohamis nga presko tan-awon.

Dugos (honey) — Lain nga tinubdan sa kinaiyahan, ang dugos nga gikan sa putyokan, dako sab ang kapuslanan niini alang sa pagmintin sa kahimsog sa atong panit, maingon man sa katibuk-an sa atong maayo nga panglawas.

Si Brigitte Mars, tagsulat sa ‘Beauty & Nature’, nagsugyot nga ang pagbutang og puro nga dugos direkta sa nanguga nga panit, nga pagaanan lang sa pagpahid o himason sa atong mga tudlo, sulod sa 2mins. Dayon hugasan og maayo sa init-init nga tubig. Inigkahuman, butangan og natural moisturizer. Buhaton kini kausa kada adlaw. Makatabang na ni nga mabatyagan ang kapresko sa panit.

Makadugang kini  sa sirkulasyon sa panit, ug palawman pa ang aksiyon niini, hangtud nga mohimsog ang atong panit, nga mobalik ang atong kabatan-on.