Mga gahi’g ulo!

Bisan unsaon, molighot gyud gihapon sa pagbiyahe ang uban kon makahigayon bisan pa man og nabutang sa pilegro ang ilang kinabuhi.

Kini ang nahitabo atol sa bagyong Agaton diin gipaubos ang tibuok lalawigan sa Sugbo sa public storm signal warning diin ang tanang sakayan sa dagat gidid-an sa paglawig.

Daghan ang nangatanggong sa mga pantalan kinsa namasin nga makauli sa ilang tagsatagsa ka destinasyon tungod lagi kay tingbalik na man sa trabaho.

Ang uban nagbagulbol nganong wala palargaha ang mga barko nga hinay ra kuno ang hangin ug gagmay ra ang bawod sa dagat.

Feeling nila nga mas eksperto pa sila kay sa PAGASA ug sa coast guard nga kon pwede molangoy na lang aron makaabot sa ilang padulngan.

Didto sa kadagatan sa dakbayan sa Lapu-Lapu nagsige og patrolya ang mga sakop sa Philippine Coast Guard aron maseguro nga walay mobiyahe nga mga bangka.

Apan nalutsan gihapon sila sanglit adunay mga gagmay nga sakayan gikan sa isla sa Caubian ang nakabiyahe paingon sa mainland, may mga gamay’ng bangka pud nga gikan sa Olango Island. Matud sa mga pasahero nga ang bawod maoy ilang kinaon busa wala sila mahadlok sa pagbiyahe kay naanad naman lagi.

Pastilan, dili ra ba gyud kapangandakan ang dagat kay mokaon ra gyud kini og tawo nga mga gahi og ulo.

Mao lagi ni ang kagahi sa ulo sa mga tawo nga magpinulosupo, apan kon madisgrasya na, ang gobiyerno ra ba ang basulon. Dili maato pagbantay sa coast guard ang lapad nga dagat ug usa ra ka patrol boat ang ilang magamit nga dunay duha ang sakay.

Angayan unta nga ibutang sa alimpatakan sa mga tawo nga usa lang ang kinabuhi nga angayang ampingan ug dili isugal taliwala sa nagdaot nga panahon.

Kon moingon na ang mga otoridad nga dili pwede mobiyahe, kinahanglan nga sundon kini tungod kay sila man ang nasayod.

Kon wala ninyo hatagi og bili ang inyong kinabuhi, hala sa pantalan pa lang, ambak na kay gusto man kaha ka nga maghikog.

 Usa ra ang kinabuhi, mao nga dili kini ikabaylo sa nabiyaan nga trabaho nga maoy giapas sa uban mao nga molighot gyud sa pagbiyahe.