Maka-inherit ba ang bata nga wala moagi sa korte ang pagsagop?

Dear Atty. Divine,

Ang pag-umangkon nako gisagop sa akong igsuon nga wa’y anak. Apan ang pagsagop niya, wa moagi sa korte. Ilang gipa-late register ang bata ug ang akong igsuon ug iyang bana maoy gibutang nga biological parents sa birth certificate sa akong pag-umangkon.

Last year, namatay ang bana sa akong igsuon ug duna kini gibilin nga mga property. Ang akong pangutana, kon maka-inherit ba ang akong pag-umangkon nga ilang gisagop sa gibilin nga properties sa iyang ama-ama nga namatay? Daghang salamat. — Tyrone

Dear Tyrone,

Ang pagsagop sa bata mahimo lang nga legal kon kini miagi sa husto  nga proseso base sa Domestic Adoption Act of 2009. Kinahanglan nga aduna gyu’y Adoption Decree nga ipagawas ang korte aron ang status sa bata makonsiderar nga legitimate child sa mga nagsagop kaniya, ug ang legal effect niini nga ang bata mahimong maka-inherit sa estate sa mga misagop kaniya.

Apan sa kaso sa imong pag-umangkon, ilang gi-simulate ang birth certificate sa bata ug ilang gibutang nga biological parents ang imong igsuon ug iyang bana bisan kon dili sila ang matuod nga ginikanan. Kini usa ka kalapasan sa balaod ug gani mahimong mapasakaan og kasong kalapasan sa Revised Penal Code ang nag-simulate sa birth certificate.

Busa tungod kay wa moagi sa korte ang pagsagop sa imong pag-umangkon, hayan wa siya’y katungod nga mo-inherit sa bisan unsang kabtangan nga gibilin sa iyang ama-ama kay wa man siya’y Adoption decree nga mapakita. Thanks and God bless.- Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_ [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.