Mikilab lang ang 2017

It seems nga bag-o lang ta nga nagsaulog sa bag-ong tuig 2017. Gumikan sa daghang panghitabo, lakip na ang nagsunodsunod nga katalagman ug mga politikanhong controversy, wala kita makamatikod sa paspas nga pagdailos sa panahon.

Dugangan pa sa daghang mga lingaw ning panahon sa kabag-ohan ug sa subrang ka-busy sa matag-usa kanato ug panikaysikay sa panginabuhian, wala na kita makadungog sa paghagtok sa taknaan, atong nataligam-an unsa na’ng orasa, unsa na’ng adlawa, unsa na’ng bulana.

Makaingon kita nga kusog ang lanat sa panahon. Apan, nagsubay gihapon kita sa naandan nga 24 oras matag adlaw, pito ka adlaw ang semana, 12 ka bulan ang usa ka tuig, ug 365 ka adlaw lang gihapon ang usa ka tuig.

Apan, gumikan lagi sa subra natong ka-busy, bisan og wala’y klaro nga agi ang atong na-busy-han, ug gumikan lagi sa daghang mga lingaw, ang  tuig 2017 mao ra’g wala moabot og 365 days.

Karon 2018 na. Sa usa ka survey nga gihimo, nakita nga majority natong mga Pinoy malaumon ug mahayag ang atong panglantaw sa unahan. Nindot ni kay kinahanglan nga ma-positive kita ug magbaton og hataas nga optimism, despite sa mga kakulian nga tingali’g maghulga kanato.

Mag-eleksiyon ra ba kita sa 2019, tingali’g mosugmat na usab ang atong panagbingkil ug pagdinaotay sa isig-usa. Hangyoon nato ang atong mga politiko, to hold lang una sa ilang mga kaikag ug pagpugong lang una sa ilang mga politikanhong ambisyon.

At any rate, goodbye 2017, welcome 2018.

* * *  

Sa atong dakbayan, ubay-ubay ang atong gihandom ug gipaabot nga matagad sa atong kagamhanan. Una sa tanan, daghan na kaayo ang mga libaong, despite nga gisugdan na ang pag-aspalto sa kadalanan. Unya, gamay lang nga uwan, bahaan dayon ang pipila ka dapit sa dakbayan, ug ang mga mountain barangays mamilegro sa pagdahili sa yuta. Ang garbage off-and-on ang pag-alagad. Ingon man, ang tubig mag-off-and-on usab ang pag-agas.

Dayon, ngiob kaayo ang dakbayan, tagsa na lang kita makakita og mga mercury lamps, mantineran lang ta og mga LED nga bombilya.

Sa kadalanan, mao na’y naghari ang mga “kings of the road,” ang mga kolurum nga habalhabal ug angkas, apan, gidasig sa dakbayan isip pagsulbad sa suliran sa trapiko.

Sama sa UBER ug GRAB, kining maong mga motorsiklo girehistro as private vehicles, apan namasahero. Sa ato pa, private vehicles for public use. Hayahay kaayo tungod kay wala’y tulobagon sa BIR.

Paturagas lang og padagan, saba kaayo ang mga tambutso, ug dili insured ang mga pasahero. Mayor?