Asawa mas opisyal pa sa bana?

Asawa sa usa ka opisyal sa kapolisan ang gihulagway nga mas hepe pa kay sa iyang bana, kinsa maoy magbuot sa tanan, lakip na mismo sulod sa buhatan. Kon unsa’y gusto ni misis maoy masunod tungod tingali kay Takosa (takot sa asawa) si Mr. official o nagkatakdo lang ang ilang pamatasan.

Usa ka tinubdan ang misulti nako nga may higayon nga miabot sa opisina si misis, wala diha si official kay nalangan sa iyang engagement. Ang gibuhat sa asawa gipanggisi ang tanang dokumento sa ibabaw sa lamesa ug gipanglabay. Igo na lang sa pagtinan-away ang mga staff ug nagpakahilom kay nahadlok sa mahimo nilang kapalaran kon mopalag.

Atol sa usa ka Christmas Party, adunay sakop nga police official nga gisayon-sayon lang sa pagmando ni misis nga pabantayon sa iyang bag, tingali apil ni sa trabaho sa polis.

Sa laing gift giving activity, gipalinya kuno ang mga bata kay hatagan og pinaskohan, apan ang bata nga dili kaayo maayo ang pustora gipapahawa ni Mrs. Official. Basin concern lang siya sa kalimpyo sa mga bata.

May alegasyon sab kalabot sa dako nga kahiwian sa magtiayon apan dili na lang ko mohisgot niini kay hearsay, pa man kini. Apan alang sa mga sakop sa organisasyon, kon tinuod man gani kini, tugotan ra ba ninyo nga yatakan ang inyong pagkatawo?

Tinood namilegro gyud ang inyong assignment kay basin ilabay mo sa dapit nga dili ninyo gusto, apan may katungod man tingali kamo nga mobarug sa pagpanalipod sa inyong katungod.

Tingali, ang uban adunay video o audio recording sa gihimo sa duha, ilabi na sa asawa ug mahimo ninyo kini nga gamiton isip ebidensya. Kining tanan pulos pa lang huhungihong hangtud nga dunay isog nga mobarug aron sa pagyagyag sa tanan.

In fairness, basin baya pud og pasangil lang kini kay adunay nasuya sa magtiayon ug gusto sila nga gub-on. Basin og naglisud sila pag-igo sa bana ug ang asawa ang gipunterya.