Kaayohan sa kinabag-an

Ang pagpasirado ni Mayor Tomas Osmeña sa Vic Enterprises adunay bati nga epekto sa ilang mga empleyado, apan naghatag kini og katagbawan ug kaayohan sa mga molupyo sa lugar diin nahimutang ang negosyo.

Mga 500 ka trabahante ang apektado sa lakang sa city government nga pagpasirado sa Vic Enterprises, apil ang tanan niining mga bodega.

Makaluluoy gyud ang ilang kahimtang kay mao man kini ang ilang tinubdan sa pagbuhi sa ilang pamilya.

Hinoon, dili man gyud sila mahimong tangtangon lang dayon sa ilang gitrabahoan kay pwede ra man silang ibalhin sa mga sangang buhatan niini, o kaha iuban sila kon asa mag-relocate sa negosyo ang Vic Enterprises.

Makisimpatiya man kita kanila, apan mas makalulooy baya ang kahimtang sa mga tawo nga nagpuyo haduol sa gireklamong negosyo.

Samtang milipang ug milambo ang negosyo, misamot usab ka grabe ang kalbaryo dili lang sa ilang mga silingan, kon dili, apil na sa mga motorista nga mangagi dihang dapita kay mura’g gipanag-iya naman nila ang karsada sa kadagko sa ilang mga sakyanan nga maoy nakamugna sa traffic.

Ang mga silingan nag-antos sa paghanggab sa abog gikan sa mga bodega nga maoy nagpaburot sa bulsa sa tagdumala sa Vic Enterprises.

Sa taas nga panahon, wala nila kini hatagi og pagtagad hangtud nga nakasugat sila og opisyal sa siyudad nga gibarugan ang yangungo sa kinabag-an.

Dili na lang ko mohisgot kon naa o wala ba sila’y business permit kay ang mahinungdanon nga makorehian ang sipyat nila, kay basin diay og matugotan sila nga maka-operate pagbalik.