Hinay apan bangis si Urduja

Nagbilin og dako nga kadaot ang bagyong Urduja, ilabi na didto sa Eastern Visayas, diin dunay mga kinabuhi nga nakalas.

Hinay ra ang bagyong Urduja kon itandi sa mga bagyo nga niigo sa nasud, apan grabe kaayo ang epekto niini sa kinabuhi ug panginabuhian sa mga tawo.

Matud sa PAGASA Visayas nga ang ulan maoy nakaingon sa kalbaryo sa katawhan, sama didto sa lalawigan sa Biliran, nga maoy nagrabehan diin gibana-banang duha ka buwan nga ulan ang gibubo atol sa pag-igo sa bagyo.

Nakamugna kini og baha ug pagdahili sa yuta diin adunay mga lumolupyo nga natabonan sa lapok. Hinay ang pag-irog sa bagyo ug milapad ang naabtan niini nga 500 diameters, diin apil ang amihanang Sugbo ang gipaubos sa public storm signal number 1.

Ngano nga nahitabo man nga dunay mga kinabuhi nga nakalas? Subra ka kompiyansa ang katawhan ug ang kagamhanan tungod kay nagtuo sila nga hinay ra ang bagyo. Hinay o kusog nga bagyo, dili kini ka tiaw-tiawan tungod kay pareho kini nga katalagman nga mokutlo sa kinabuhi ug mogusbat sa mga kabtangan.

Wala pa gyud diay maleksyon ang mga tawo sa bagyong Yolanda nga walay pagpakabana mismo sa kinabuhi tungod kay dali ra kaayo makalimot sa mga mapait nga panghitabo.

Kon ingon niini ang mentalidad sa mga tawo, may makalas gihapon panahon nga adunay moigo nga katalagman. Mopasangil ra ba dayon ang uban nga tungod sa climate change nahitabo kining mga ingon niini nga kasinatian.

Para nako, dili man tingali ang klima maoy nausab, kon dili, ang atong kinaiyahan nga giabusohan sa katawhan tungod kay ang mga bukid gipangpatag, ang kadagatan giabunohan ug yuta nga miresulta sa kausaban kon unsa man ang naandan.

Igo ra seguro ni-adjust ang klima sa mga kausaban nga gimugna sa mga tawo nga ang kaugalingon lang ang gitan-aw.