EDITORYAL – Disgrasya sa pabuto

Medyo hilom kaayo karon ang mga kabarangayan gikan niining mga lanog kaayong mga pabuto, apan aduna gihapoy mga panagsang mga buto-buto nga kinawat-kawat nga pagpabuto sa mga bata.

Ang presidente mipagawas sa Executive Order No. 27 pipila ka bulan na ang nakalabay nga nagdili sa pagpataka og pagpamaligya ug pagpabuto bisan asa.

Busa lanog kaayo ang panawagan  ngadto sa mga local government units nga magtagana og fire cracker zones diin mahimong mapalit ang mga pabuto aron dili bisan asa lang may mamaligya kay peligro sa aksidente.

Ang Department of Health miawhag gani ngadto sa mga local government units nga maghimo na lang og community fireworks display aron malayo sa disgrasya ang mga tawo ilabi na ang mga bata nga bisan asa lang magpabuto.

Sayon ra man unta kini buhaton, kini kon molihok lang gyud hasta ang mga barangay opisyales pagdili niining mga mamaligya og pabuto diha sa kadalanan ug bisan sa mga sari-sari stores.

Sa nanglabay nga katuigan, daghan kaayong mga nadisgrasya tungod sa pabuto. Adunay nangapungkol, adunay namatay , nabuta, ug gipang-atake sa sakit nga hubak tungod sa pabuto.

Kumusta na kaha kadtong mga batang nangaputlan og mga kuyamoy , kamot ug nangabuta kaniadto? Nakatrabaho ba sila karon?

Ang ingon niini nga mga senaryo unta ang likayan. Kanang moabot ang panahon nga magmahay-mahay ang tawo tungod sa pagpabaya kaniadto.

Siguro kadtong mga nangadisgrasya kaniadto mao na karoy nangampanya batok sa pabuto. Maayo kini kay buhi man silang saksi sa kadaot nga bunga sa pabuto.

Aron mas masayon sa mga otoridad nga mamenusan kining aksidente sa pabuto, mas maayong ang mga tawo mismo maoy mobadlong sa mga silingan nilang mamaligya ug magpabuto niini inay nga moabiba pa kanila.

Mas maayong saulogon ang Pasko ug sugaton ang Bag-ong Tuig nga kompleto pa ang mga tudlo nungka mahayan ang maong mga adlaw kada tuig nga moabot.