Alerto sa Misa de Gallo

Magsugod na ugmang adlawa ang Misa de Gallo nga molanat og siyam ka adlaw nunot sa pagsaulog nato sa Pasko.

Gilauman nga modagsa ang katawhan sa mga simbahan aron motambong sa misa nga himoon panahon sa kaadlawon.

Nabatasan naman sa mga Romano Katoliko nga kompletohon gyud ang siyam ka adlaw balon ang tagsa-tagsa ka pangaliyupo sa Batang Hesus nga unta hatagan sila sa ilang gipangayo.

Ang uban nagtoo nga matuman ang ilang wish kon magsakripisyo sila sa pagmata ug sayo alang sa misa de gallo.

Mabaw ug hakog ra kaayo kini nga rason tungod kay nagpakita lang  kon unsa ka self- centered ang usa ka tawo nga mosimba lang tungod kay adunay gipangayo nga pabor.

Mosimba kita tungod kay gihimaya ug gidayeg nato ang atong Manunubos nga si Hesukristo nga sentro sa Pasko.

Basin usab ug kutob lang sa sinugdanan motambong sa misa de gallo ug dili na makalahutay sa pagmata og sayo hangtod sa kataposan.

Pahimangno lang usab sa katawhan nga seguradohon nga safety ang atong pinuy-anan nga mabiyaan kay basin inig biya nato mopuli usab dayon ang mga kawatan.

Ang kapolisan ipaubos sa full alert sugod karong adlawa aron masiguro nga magmalinawon ang kalihokan.

Mobutang sila og mga public assistance desk sa mga simbahan nga kadangpan sa mga tawo ugaling mabiktima sa mga badlongon.

Bisan og adunay mga pulis, angayan nga magmatngon gyud kitang tanan alang sa atong kaluwasan.