Si Duterte mohatag man pud og ganti

Angay kining hinuktokan sa mga opisyal sa dakbayan sa Sugbo nga bag-ohay pa lang nanumpa nga alyado sa PDP-Laban ni Presidente Rodrigo Duterte.

Basin og nakalimot sila nga si Duterte mitanyag usab og ganti sa mga makapatay og drug lord. Kon wala ko malimot, P2 milyones man gani ang gitanyag niya nga ganti sa makapatay.

Kay ang mga opisyal nga alyado sa Team Rama nanumpa man nga alyado sa partido sa presidente, ayaw ko’g ingna nga wala sila makagusto sa gihimo ni Duterte.

Gihisgotan nako ni kay nakahinumdom ko nga gisaway man sa mga alyado sa Team Rama ang gihimo ni Mayor Tomas Osmeña nga pagtanyag og P50 mil ngadto sa makapatay’g kriminal.

Ang maong kantidad wala isipa ni Osmeña nga ganti, kon dili, pagtabang sa mga polis kay basin unya og sila magkakaso pananglit mokiha ang kabanayan sa ilang mapatay nga kriminal.

Buyno, kining ako, usa lang ka pagpahinumdom sa mga alyado sa Team Rama nga nagpasakop na sa PDP-Laban. Nakasiguro ko nga lantugion man gyud nila ni.

Apan akong klaruhon nga sa pagpadayag nako niining mao nga punto, wala kini magpasabot nga nag-inabogado ko para ni Mayor Osmeña, apan gipadayag lang nako ang tinuoray’ng punto.

* * *

Salamat kaayo sa mga sakop sa CITOM, ilabi na ni Consultant Joe Mendaros, kay giaksiyonan dayon nila ang reklamo sa mga taga F. Villa Street, Barangay T. Padilla, kabahin sa illegal night parking sa maong lugar.

Awhagon nako ang mga sakop sa CITOM clamping team nga kanunayon ninyo sa pag-clamp ang mga sakyanan nga anaa ra sa karsada iparada, ilabi na panahon sa gabii.

Kamo nga taga diha sa maong dapit angay kamo nga maghugpong ug barugan ninyo ang inyong katungod. Hinumdomi ang nahitabo niadtong Agosto 9, 2010 nga niulbo ang dakong sunog sa inyong lugar, ug ang mga bombero dugay nga nakapawong kay wala na’y kaagian.

Gusto ba kamo nga mahitabo na usab kini pag-usab? Gisulod nako ang F. Villa sa miaging semana ug nakita nako nga ang karsada gibuhatan na og tindahan.

Dunay dako kaayong pundok sa mga dagkong kahoy nga misuyla na ngadto sa karsada gikan sa aseras. Nag-atbangay na lang ang mga tindahan nga anaa sa karsada gitukod, ug lisud na ang pag-agi sa mga sakyanan.

Hain na man ang mga maayong pangisip ninyo nga inyo man kana nga gihimo?