Asa ang unahon

Miisa ang kilay sa mga nagpakabana sa ihatag ni Mayor Tomas Osmeña nga P50 mil sa polis nga makapatay og kriminal.

Ang mga sakop sa oposisyon sa konseho sa dakbayan sa Sugbo nga kasagaran mga abogado mihulagway sa laraw sa mayor nga dili makatabang sa pagsumpo sa krimen, hinuon makapaengganyo pa kini sa mga polis paghimo og krimen tungod sa kantidad sa salapi nga gitanyag.

Apan giklaro sa mayor nga dili reward ang iyang ihatag nga salapi kun dili tabang sa polis nga makapatay og kriminal.

Kon ugaling tabang man ang ihatag sa kagamhanan ni Mayor Tomas Osmeña ngadto sa polis makapadasig kini sa polis sa paghimo sa ilang trabaho ug angayan nga suportahan. Luoy man gud ang polis nga nag-atubang og kaso tungod sa paghimo sa iyang trabaho unya maoy mogasto sa bayad sa abogado.

Apan kon namakak ang mayor sa iyang rason, mas maayo nga ang iyang ihatag sa polis tabang dili reward.

Namalit ang liderato sa kapolisan og mga body cam aron mapanalipdan ang mga polis sa tumo-tumo nga pasangil sa kahiwian ug aron mapanalipdan usab ang katawhan sa badlungon nga mga polis.

Apan ang akong pangutana asa man ang mas mahinungdanon ang kinabuhi sa polis o ang pasangil nga kahiwian?

Sugyot nako sa liderato sa kapolisan nga apilan pud sa pagpalit og bullet proof vests ang mga polis aron adunay makapanalipod sa ilang lawas sa bala sa armas sa ilang kontra kay ang mga body camera dili makapanalipod kanila sa bala ug armas sa ilang kontra.