Legal assistance ni Osmeña

Niining pagbalik na sa Philippine National Police sa gubat batok sa druga, aniay maayong balita si Cebu City Mayor Tomas Osmeña ngadto sa kapolisan sa dakbayan. Kini mao ang paghatag kanila og P50,000 sa matag kriminal nga ilang mapatay sa linya sa ilang trabaho.

Matud ni Osmeña, ang maong kantidad alang sa mga sakop sa kapolisan nga malambigit unya sa mga kaso sa ilang trabaho pagtumba sa mga kriminal. Angay gayud kuno nga tabangan ang kapolisan tungod kay kulang sila sa resources sa mga kaso unya nga ilang giatubang.

Ikaduha na kini ka higayon nga mitanyag ang mayor og salapi sa kapolisan sa kampanya pagpuhag sa mga kriminal, ilabina niadtong nalambigit sa negosyo sa ilegal nga druga.  Sa niaging tuig mihatag usab siya og ganti niadtong mga pulis kinsa mitumba og mga tulisan, drug dealer ug uban pa.

Kaniadto dili legal assistance ang termino sa maong salapi nga gitunol sa mayor ngadto sa kapolisan. Klaro nga ganti kadto sa mga kalampusan sa kapolisan sa ilang paggukod sa mga kriminal. Apan unsay kalainan niini ug sa maong tabang pinansiyal sa mayor karon?

Hinuon iyang giklaro nga ang P50,000 nga gikan sa dakbayan legal assistance gayud kini ngadto sa mga pulis nga hapakon unya og kaso sa ilang pagtiklo sa mga kriminal. Apan morag walay kalainan kini sa ganti nga gihatag ni Osmeña sa niaging tuig.

Ang nakadiperensiya niini mao nga sa niaging tuig, personal nga salapi ang gitunol ni Osmeña ngadto sa kapolisan nga makatumba og kriminal. Apan karon, pundo gikan sa iyang discretionary fund ang iyang ihatag, kuwarta nga gikan sa kaban sa dakbayan.

Hinuon kining maong kalamboan naghatag lamang og mensahe ngadto sa mga bugok sa katilingban nga mihimo na og hingusog nga lakang ang lokal nga kagamhanan ug ang kapolisan pagtinuod sa kampanya batok sa kriminalidad niining siyudad.

Mao na nga sa umaabot nga mga adlaw, makapaabot kita nga daghan na usab ang mapitlok nga mga badlongon sa komunidad. Ug magsilbi kining pamahayag ni Osmeña nga warning alang niadtong mga kriminal nga pabiling naglihok ning dakbayan.

Dako akong suporta niining maong lakang sa dakbayan. Apan kinahanglan usab nga likayan na sa kapolisan ang pagpataka unya og luthang nga mosangpot na hinuon unya sa mga alegasyon sa extrajudicial killings ug ilegal nga operasyon.