Ilhanan kon hain makapusta

Tinuod ang giingon ni Mayor Tomas Osmeña nga daghan sa mga polis ang magpanagana sa pagtuman sa ilang katungdanan kay nahadlok nga basin og makahinayak sila, unya mapatay nila ang mga nakahimo og salaod, dayon mag-atubang sila og kaso tungod sa ilang gihimo.

Nakasabot ko nga nahimong talawan ang ubang polis tungod kay kuwang sila og pagsabot kabahin sa ilang trabaho. Gihimo man gud nila ang pagsulod sa serbisyo sa kapolisan aron makabaton og sweldo, ug wala sa ilang hunahuna nga makaserbisyo sila sa katawhan.

Sama gud kanamo sa media, risgo usab nga makasohan kami og libelo, kon motuki ug mohisgot kami og mga delikado kaayong mga isyu kay posible nga kadtong maapike, mopasaka unya og kaso. Sagad ra ba gyud nga ang hingtungdan maoy mangita’g ikapiyansa.

Dili ikalimod nga daghan usab sa mga sakop sa media ang magpanagana sa pagtuki og mga sensitibo kaayo nga mga isyu kay nahadlok nga makihaan. Aw, hinuon, kami sa media, ang kompaniya man maoy mohatag og abogado nga makalaban kanamo.

Apan ang kapolisan nga mapasakaan og kaso, ilabi na og ang mopasaka og kaso mao ang Commission on Human Rights (CHR), ang mao nga polis maoy makapangutkot sa ulo sa problema.

Mao kini ang rason nga si Mayor Osmeña nakahuna-huna nga mohatag og P50 mil nga cash assistance sa mga polis nga makapatay og mga tawo nga badlungon sa katilingban. Kini sama sa drug pusher, mga tulisan, snatchers ug uban pa nga mga daotang tawo.

Tingali, pinaagi niini madasig na kadtong mga talawan nga polis nga mohimo sa ilang katungdanan. Unya, kadtong mga polis nga daan na nga abtik nga mohimo og kampanya batok sa mga badlungon, mosamot pa kaabtik.

Unya, sawayon diay ang gihimo sa mayor? Unya bitaw kon ang usa ka mayor magpadingul-dingol lang sa mga krimen nga nanghitabo sa iyang teritoryo, dudahan dayon nga kakonsabo sa mga daotang elemento?

Ang balaod naglatid nga kadtong mga mayor nga walay gihimo sa pagkontrolar sa kagubot ug sa mga krimen sa iyang dapit, mahimong tangtangan sa iyang pagka deputy sa National Police Commission (Napolcom). Nahitabo na kini kang Mayor Osmeña diha nga gipasanginlan siya nga wala na moabag sa kapolisan dinhi sa dakbayan sa kampanya batok sa gidiling drugas.

Mao nga alang kanako, tukma ra kining gihimo sa mayor nga mohatag siya og P50 mil nga tabang ngadto sa mga polis nga makapatay og daotang elemento. Ang masuko niini, tingali tua sila makapusta sa pikas.