Pagkarakara sa Dengvaxia
Ang Formulary Executive Council (FEC), pundok sa mga eksperto nga gitudlo sa Department of Health (DOH) nga motambag nila sa tukma nga mga tambal sa mga sakit sa katawhan, niluwat sa mosunod nga mga rekomendasyon sa Dengvaxia, labing una nga bakuna batok sa dengue:
• I-anam-anam sa pagpatuman sa mga dapit nga labing daghan ang mga nangasakit og dengue;
• Anam-anamon sa pagpalit ang bakuna;
• Ilusad ang kampanya pagpasabot sa bakuna; ug
• Susihon ang epekto sa bakuna ngadto sa mga pasyente.
* * *
Nipasabot si kanhi Health Secretary Janette Garin nga natuman nila ang mga rekomendasyon kay ang tulo ka pilot areas—Metro Manila, Central Luzon ug Calabarzon—maoy labing taas og mga kaso sa na-ospital ug nangamatay sa dengue, napasabot nila ang mga pasyente ug ilang mga ginikanan ug gibantayan ang kahimtang sa mga nabakunahan.
Apan klaro nga nalapas ni Garin ug sa DOH ang rekomendasyon sa anam-anam nga pagpalit sa Dengvaxia. Gitingob nila pagkompra ang tulo ka milyon ka bakuna nga balor og P3.5 bilyones sa way pagsusi pila gyud ang mga bata nga nagkinahanglan.
* * *
Giangkon ni Health Secretary Francisco Duque III nga ang FEC igo lang sa pagrekomendar. Nga di obligado nga motuman nila ang DOH secretary sama ni Garin. Kinsa mao gyud ang magduma sa mga programa sa kahimsog sa nasud.
Nitataw hinuon si Duque nga ang mga sakop sa FEC mga tinudlo sa DOH secretary kay pulos mga eksperto sa nagkalainlain nga natad sa pagpanambal. Busa mapuslanon alang sa tanang hingtungdan ang pagpaminaw sa ilang mga panahom sa epektibo nga pagduma sa mga epidemiya sama sa dengue.
* * *
Ang 11 ka sakop sa FEC mga eksperto sa pharmacology, toxicology, clinical epidemiology, pharmacy, clinical medicine, public health, health economics, health social science and law ug medicine. Magpabilin sila sa katungdanan hangtod sa tulo ka tuig.
Kon gituman pa lang unta ni Garin ug sa mga nisunod niya sa DOH ang tanan nga rekomendasyon sa FEC, hagbay ra unta nga nahibaw-an ang negatibo nga mga implikasyon sa Dengvaxia, bisan sa wa pa angkona sa Sanofi Pasteur nga makadugang sa risgo nga mahiagom sa mas grabe nga dengue sa mga nabakunahan nga wa pa matapti og dengue.
- Latest
