Ang buotang lungsoranon

Kaniadtong Biyernes, Disyembre 8, 2017 nakadawat ko og text gikan ni Nika Albores akong tinun-an sa Southwestern University-Phinma nga namalihog sa pagpaabot sa ilang pasalamat sa kahanginan sa usa ka bata nga upat pa lamang ka tuig ang panuigon tungod sa pag-uli sa P49 mil nga salapi sa iyang inahan.

Ang unod sa iyang text nga wala nako gi-edit mao ni: “Good afternoon sir Gerry, Nika ni sir magpabroadcast unta mig pasalamat sir. Magpasalamat unta mi sir sa usa ka bayani na bata na si Hannah Alexa Baclayon 4 years old na taga Pardo na maoy nakapunit sa 49k na kwarta sa ako Mama na si Medy Albores ug sa iyang inahan na si Irish Baclayon sa pagturn over anis a Barangay Hall sa Pardo. Dako pod mig  pasalamat sa mga taga Barangay Hall sa Pardo sa pag asikaso namo.”

Dalaygon ang gibuhat sa bata. Sa kalinghod sa iyang edad nakahimo na siya og buhat sa usa ka buotang lungsoranon.

Dalaygon usab ang ginikanan sa bata tungod kay maayo ang pagmatuto ug pagpasunod niini sa mga maayong gawi ug buhat.

Kon dili pa maayo og gawi ug buhat ang ginikanan sa bata seguro wala na mauli ngadto ni Mrs. Medy Albores ang dakong kantidad sa salapi nga nawagtang.

Ang maayong buhat sa upat pa lamang ka tuig nga bata nga si Hannah Alexa ug sa iyang inahan nga si Irish angayan nga panaminan sa uban ilabi na gayud niadtong mga dagko na.

Tungod sa dalaygon nga buhat sa bata akong giawhag ang pamunoan ni Pardo Barangay Kapitan Altea Lim sa paghatag og pasidungog o komendasyon ngadto sa bata nga iyang ikapakita ngadto sa uban ug iyang makita ug mabasa inig abot na sa sakto niyang edad ug panabot.

Alang kang Hannah Alexa ug sa iyang inahan nga si Irish Baclayon akong ipaabot diha kaninyo ang dakong pagsaludo.