EDITORYAL- Sulsol o makatabang?

Mikisi-kisi ang oposisyon sa konseho sa dakbayan sa Sugbo bahin niining tanyag ni Cebu City Mayor Tomas Osmeña nga P50 mil sa matag kriminal nga mapatay sa mga polis. Matud sa mayor dili kini reward kondili legal financial assistance lamang para sa mga polis kon mag-atubang sila og kaso tungod sa ilang paghimo sa ilang trabaho.

Kon ang oposisyon maoy pasultihon magtukmod daw kini sa mga polis nga dili magpanagana paggamit sa ilang pusil ngadto sa mga suspek kay magsalig naman total aduna bitaw P50 mil nga tabang ang siyudad pagbayad og abogado kon magkinaunsa.

May rason kining pangagpas ug kabalaka sa oposisyon tungod sa mga nangaging mga kaso sa extra-judicial killings ug kwestiyonableng pagkamatay sa mga drug suspects ug gidudahang nagpaturagas sila paggamit sa ilang armas ug niabuso sa gahom ug gihimo na lang pangulipas ang pulong “nanlaban” o “nisukol” maong ilang napusilan.

Apan dili man kini mao ang tinud-anay nga nahitabo, kay aduna man gyuy mga polis nga nakasohan tungod sa pag-abuso sa ilang gahom.

Nahimo pa gani kining rason kon nganong makaduha ka higayon na silang gitangtang ni Presidente Duterte sa kampanya kontra ilegal nga drugas ug karong bag-o lang gibalik.

Dili ikalimod nga may pipila ka hut-ong sa publiko nga uyon sa “shortcut” nga pamaagi paghipos sa mga kriminal tungod sa ngalan lang nga sila kriminal ug sagbot sa katilingban. Sagad niining nakauyon biktima sab sa krimen o dili gustong mabiktima sa krimen.

Kaning gibuhat sa mayor dili angay ikalain kay tabang kini sa siyudad aron mas mangusog ang kapolisan sa pagprotektar sa katawhan.

Kinahanglang  suportahan sa LGUs ang kapolisan, apan kinahanglan ubos sa kondisyon nga ilang respetuhon ang tawhanong katungod sa mga suspek ayha pa ang paggamit og kusog kon tinuod nga nabutang sa peligro ang ilang kinabuhi.

Niining paagiha mobalik ang dakong pagsalig sa katawhan nga tinarong ang trabaho sa polis.