Kolurum biyahe paingon sa SRP

Wala gyud masayop si Mayor Tomas Osmeña sa pagtudlo pagbalik ni Raquel Arce isip maoy pangulo sa PROBE Team, ang clearing team sa City Hall. Diha nga mibalik na si Arce pagdumala sa clearing team, namatikdan nako nga nagbinuotan dayon ang mga tigbaligya og imahen likod sa Basilica del Santo Niño.

Bisan og wala tumana sa mga vendors ang gikasabotan diha nga gitugotan sila kaniadto nga makagamit nga libre sa mga stalls ug makapaninda sa mao nga lugar, apan arang-arang na lang. Unya, dunay namaligya og ukay-ukay nga sinena ug nagbutang og lamesa nga kan-anan sa aseras sa D. Jakosalem gihawanan dayon nila.

Anam-anamon lang nato. Lahi gyud kon ang ibutang nga hepe sa clearing team adunay kaisog nga motuman sa iyang tahas kay duna gyuy kalamboan. Usbon ko, salamat ni Mayor Osmeña nga naminaw sa mga sugyot kaniya sa pagbalik ni Raquel Arce sa iyang daan nga pwesto.

Unya, diay reklamo nga ang tag-iya sa tulo ka tindahan diha sa Labucay Building sa dalan Calderon, nagbutang kuno og mga baligya sa aseras atubangan sa tindahan. Ang mireklamo niini usa ka tawo nga kanunay’ng moagi diha sa maong dapit. Palihug niini Ma’am Raquel.

* * *

Ang balaod nagmando gyud nga ang mga agawon, o tagdumala sa mga negosyo, kinahanglan nga mohatag gyud og 13th month pay nga katumbas sa usa ka buwan nga sweldo, ngadto sa ilang mga empleyado.

Kinahanglan nga ihatag kini nga dili molapas sa Disyembre 25, kay kon dili, aw, mag-atubang kamo og reklamo. Dunay mireklamo nako nga usa kuno siya ka construction worker. Dugay na kuno siyang nagtrabaho ug wala kaabot og minimum ang iyang sweldo ug wala siya’y 13th month pay.

Isumbong na sa Department of Labor, unya hatagi ko og kopya sa imong reklamo. Kaluoy sab ning mga tawhana uy.

* * *

Uy, unsa ning report nga miabot nako? Atensyon LTFRB-7 regional director Ahmed Cuizon, kay duna kuno’y grupo sa mga kolurum nga sakyanan nga namasahero sa rota paingon, ug gikan sa SM Seaside sa SRP, balik dinhi sa downtown.

Ang nagpadagan niining mao nga mga kolurum, sigun sa report, mao ang usa ka gianggaan og “Kabang” nga nangangkong media, unya suod kuno siya ni Mayor Osmeña. Pag-sure diha uy!

Unya, ang akong informer miingon nga kini si Kabang mangayo gikan sa mga drayber og tag P1,500 ang semana aron sila makapasahero ug maapil sa linya. May back-up usab kini nga CPA police, sigun sa report. Atimana sir Ahmed, palihoka dayon si Jun Tumulak.