EDITORYAL - Abi kay pista maghubog diay?

Ang argumento sa ubang mga tawo, mao nga basta pista gani kuno, dili gyud malikayan ang pag-inom og mga ilimnon nga makahubog. Klaro kaayo nga ang maong mga tawo wala makagusto sa plano ni Mayor Tomas Osmeña nga idili ang pagbaligya ug ang pag-inom og mga ilimnong makahubog sulod sa 300 metros gikan sa mga karsada nga anha moagi ang Sinulog Grand Parade.

Nasayod ang mayor nga may mga tawo gyud nga dili makagusto niining iyang plano, apan dili niya kini igsapayan tungod kay nahunahuna ni Mayor Osmeña nga mas daghan gyud ang malipay kon malikayan ang mga kagubot tungod sa mga hubog nga magsamok-samok na gani sa mga sakop sa dancing contingents. Sagad gyud nga matag Sinulog, daghang tawo nga ang uban gani mga langyaw ug mga balikbayan, nga maglakaw-lakaw na lang diha sa daplin na gyud sa parade route samtang magbitbit og ilimnong makahubog.

Angay gyud nga estriktong idili ang pag-inom og ilimnong makahubog diha sa mga publikong lugar tungod kay ang Cebu City Ordinance 512, nga nagdili sa pag-inom og mga ilimnong makahubog sa mga public places dinhi sa dakbayan sa Sugbo, dili man masuspenso tungod lang kay nagpista ang siyudad. Wala did-i sa mayor ang mga tawo kon adto sila maghubog sa ilang panimalay, o sulod sa ilang kwarto sa hotel.

Sa milabay’ng tuig, gibadlong sa kapolisan ang pipila ka balikbayan nga hubog na og nagpataka na lang pagpanggakus sa mga babaye nga ilang magustohan didto sa General Maxilom Avenue, duol sa gitawag karon og Mango Square. Tungod kay naulipon na man sa espiritu sa bino, ang mga hubog dili na gani mopatuo sa mga polis.

Kon daghang hubog nga magsuroy-suroy atol sa pagpahigayon sa Sinulog Grand Parade karong Enero 21, dili kalikayan nga masubli ang kagubot nga nahitabo didto sa dalan Juana Osmeña nga giadto gyud gani sa mayor ug iyang gipangbadlong.