Mga numero sa dengue
Usa ka adlaw human gipahibawo sa Sanofi Pasteur nga ang Dengvaxia makahulga sa mga nabakunahan nga wa pa sukad matapti og dengue, gibutyag ni Health Secretary Francisco Duque II nga kapin sa 733,000 ka bata nga nagpangedaron og 9 ngadto sa 14 ang nabakunahan sa Metro Manila, Central Luzon ug Calabarzon.
Human sa pila ka adlaw, nitug-an si Duque nga mas daghan diay ang aktuwal nga nabakunahan, niabot og 830,000 ka bata. Wa siya maghisgot sa kapin sa 159,000 ka bata nga nabakunahan sab dinhi sa Sugbo.
* * *
Dungan sa pagpamakuna sa Sugbo, nga karong tuiga pa nadugang sa tulo ka rehiyon isip pilot areas, gibakunahan sab og Dengvaxia ang 15,000 ka polis ug mga sakop sa ilang pamilya sa Kampo Crame ug ubang presinto sa kapolisan sa Metro Manila.
Kon ipuno ang tanan nga numero nga giluwatan sa Department of Health (DOH), moabot og kapin sa usa ka milyon ang nabakunahan: Duha na ka hugna sa mga tinun-an sa Luzon; apan usa pa ka hugna sa mga bata sa Sugbo ug mga polis sa Metro Manila.
* * *
Mas gamay ang numero sa aktuwal nga nabakunahan sa Luzon, segun sa mga dokumento sa DOH:
Niabot og 534,303 ka tinun-an ang nakakuha sa pagtugot sa ilang mga ginikanan nga mabakunahan; ug 491,990 ra ang nabakunahan sa una nga hugna niadtong Abril, Mayo ug Hunyo 2016 ubos ni kanhi Health Secretary Janette Garin;
Ug 415,681 na lang ka tinun-an ang nabakunahan sa ikaduha nga hugna niadtong Oktubre, Nobiyembre ug Disyembre 2016 ubos ni kanhi Health Secretary Paulyn Ubial.
* * *
Ang pagsubay sa mga numero sa dengue makabutyag sa dakong buslot sa P3.5 bilyones nga transaksiyon: Nangompra ang DOH og tulo ka milyon ka bakuna alang sa usa ka milyon ka tinun-an sa Grade 4 sa tulo ka rehiyon; apan 729,287 ra ang aktuwal nga ihap sa mga tinun-an.
Sa ato pa, gipakapin lang ang mga bata sa Sugbo ug mga polis sa Krame kay subra ang nakompra nga bakuna. Sa 1.4 milyones ka bakuna nga nahibilin, dul-an sa tunga sa milyon ang mo-expire karong Abril ug ang nahibilin sa Agosto 2018.
***
- Latest
