Inahan nga kadangpan

Gisaulog karong adlawa sa mga Romano Katoliko ang Immaculate Conception, ang pagpanamkon sa mahal nga Birhen Maria nga limpyo gikan sa sala nga panulondon, o original sin, human siya napili nga mahimong inahan sa Dios nga Anak nga mao si Hesukristo.

Ang Immaculate Conception usa sa mahinungdanon nga kalihokan, ilabi na sa mga Marian devotees, dili aron simbahon, kon dili, aron hatagan sa atong pagdayeg kaniya ang inahan sa atong Manunubos.

Sa mga problema nga atong masugatan, usa sa atong sampiton mao ang atong inahan kay dili gyud kita balibaran niya tungod sa kaaghop sa iyang kasingkasing.

Ingon usab niini ang atong gibuhat isip mga Katoliko nga kon aduna kita’y iampo sa Ginoo, magpatabang kita sa pag-ampo sa mahal nga birhen kay nasayod kita nga dili makabalibad ang iyang Anak sa pangaliyupo sa iyang inahan.

Sama sa milagro nga nahitabo sa kasal sa Cana diin nahutdan og bino nga mainom, apan dihang gihangyo ni Maria si Hesus, gihimo niining bino ang tubig nga diha sulod sa mga tadyaw.

Gikinahanglan nato karon ang tabang sa langitnong inahan sa nag- ung-ong nga krisis sa kinabuhi sa mga bata nga naturokan og Dengvaxia vaccine.

Ang hugot nga pag-ampo maoy atong kadangpan nga unta dili mahitabo ang gikabalak-an nga human sa catastrophe’ mugna sa dengue nga gipagrabe pa sa Dengvaxia vaccine.

Ang malumo nga kasing-kasing sa inahan sa Dios ang nagpitik alang sa kabataan nga nagkinahanglan sa kanunay niyang panabang.