Mga bag-ong opisina sa LTO

Nakabisita ko sa Land Transportation Office (LTO) diha sa Natalio Bacalso Avenue, ning dakbayan sa Sugbo aron pag-process unta sa pag-transfer sa rehistro sa akong sakyanan.

Nasuta nako nga daghan man gihapon nga mga tawo nga magpunsisok diha aron mo-transact og busines, sama sa pag-renew sa driver’s license ug pag-renew sa rehistro sa ilang sakyanan.

Pastilan, akong nahibaw-an nga wala diay sila masayod nga ang LTO-7 regional office miabli na og mga satellite offices sa LTO diha sa Robinson’s Fuente.

Gitug-anan ko sa akong higala nga kawani sa LTO nga paspas kaayo ang transaksyon sa pag-renew sa lisensya didto sa Robinson’s Fuente kay menos pa man kaayo ang nakahibalo niini.

Mura’g kuwang sa propaganda ang LTO-7 regional office aron ang mga tawo masayod sa kalamboan sa ilang opisina. Tiaw mo, diha’y akong napangutana nga taga Mandaue City.

Didto lang kuno siya magpa-renew sa iyang lisensya sa LTO-7 Cebu City district office kay wala na man kuno ang LTO sa Mandaue.  Wala ko makapugong sa pagkatawa samtang nagtutok sa maong tawo.

Wala diay siya masayod nga ang LTO district office sa Mandaue gibalhin na sa JCenter Mall diha sa Barangay Bakilid, Mandaue aron nga mas harohay ang kahimtang sa mga mo-renew sa ilang driver’s license ingon man pag-renew sa ilang rehistro sa sakyanan.

* * *

Tan-awa, nindot kaayo ang epekto sa pagbalik ni Mayor Tomas Osmeña kang Raquel Arce, isip maoy pangulo sa City Hall clearing team.

Magpasalamat ko ni Mayor Osmeña nga naminaw siya sa mga tambag sa iyang mga suod. Dili pagsipsip ni Arce, kugihan motrabaho kining mao nga kawani sa City Hall.

Kon unsay itahas kaniya sa City Hall, iya gyud nga tumanon. Resulta, nabantayan nako nga napitol dayon ang kabadlungon sa ubang vendors sa likud nga bahin sa Basilica del Santo Niño nga namaligya og imahen sa mga santos.

Sigurado ko nga kon hatagan lang sa igong suporta kini si Raquel, makatampo siya sa kahapsay ug kahusay sa atong dakbayan. Dili pareho niadtong daan nga hepe sa Probe Team nga wala gyud tawon.

Kini gud nga mga sidewalk vendors, kon imo silang patuyangan lang sa pagpaninda diha sa aseras, magtuo kini sila nga sila na ang tag-iya sa aseras. Moabot ang panahon nga dili na sila magpabadlong.

Mao nga mentras karon pa lang daan, badlungon na sila kay aron dili motaas ang ilang mga sungay. Anugon kaayo ang daghang sakop sa Probe Team nga walay tarong trabaho kaniadto.