Kanus-a makapangayo og back support ang bata

Dear Atty. Divine,

Duna ko’y anak nga 7 years old na karon. Anak ni nako sa akong kanhi live-in partner nga akong gibuwagan samtang 2 years old pa ang bata, tungod sa iyang bisyo. Wa ko niya mangayo og support kaniadto kay nagtrabaho man ko ug dako sab ko og sweldo.

Apan karon nanira ang among company ug ang bata nag-eskwela na sa private school. Gusto ko nga mangayo og suporta gikan sa amahan sa akong anak. Unsay akong buhaton? Mahimo ba nga i-apil nako og pangayo ang “back support”? — Lucy

Dear Lucy,

Yes duna kay katungod nga mangayo og suporta sa bata gikan sa iyang amahan. Obligado siya nga mohatag niini base sa atong balaod. Ang suporta nga mahimo nimong pangayuon naglakip sa iyang education, pagkaon, pinuy-anan, medicines, transportation, clothing ug uban pa.

Busa ang maayo nimong buhaton mao ang pag-compute kun pila ang expenses sa  bata matag buwan. Human niini imong padad-an og demand letter ang amahan sa bata gikan sa imong abogado alang sa imong pangayuon nga suporta sa bata, matag buwan.

Samtang kalabot sa back support, maglisud ka sa pagpangayo niini kay ang back support mahimo lang kini nga demandable kun imo na kining gi-demand kaniadto apan wa siya mohatag.

Base sa mga desisyon sa Korte Suprema, ang support mahimo lang demandable from the time nga mi-demand ang tawo nga entitled sa support.

Busa kun wa ka makapangayo og suporta sa bata kaniadto hayan dili sab ka makapangayo og back support.

Hinuon pwede ra sab nimo nga i-apil sa imong demand ang back support pamasin nga mohatag ra sab ang amahan sa bata, apan dili ka makapugos niya paghatag sa back support.Thanks and God bless. — Atty Divine