Protesta nga sayop

Nagprotesta na usab kagahapon ang mga PUJ drivers nga supak sa tinguha sa kagamhanan nga dili na padaganon ang mga public utility vehicles nga subra na sa 15 ka tuig.

Para kanako, angay’ng tugotan lang gihapon nga magamit sa pagpamasahero ang mga karaang sakyanan basta giatiman kini sa mga tag-iya ang makina ug ang lawas sa sakyanan.

Apan pastilan, kadaghanan sa mga karaan nga sakyanan, makita nimo nga gipasagdan na lang sa mga tag-iya nga ang gihunahuna mao ra nga sila makadawat sa abang.

Tinuod, daghan na nga mga nindot nga PUJ, apan daghan pa usab ang mga laksot na kaayo. Dili problema kon karaan nga sakyanan. Ako bitaw, karaan man ang sakyanan, apan inatiman.

Kining mga drayber nga sagad mohimo og protesta, tingali sagad kanila mao kining mga drayber nga nagmaneho og mga PUJ nga nagbuga og itom kaayo nga aso ug mga kagang-kagang nga PUJ.

Busa, mas labing maayo nga ang kagamhanan mopadayon sa pagwagtang sa mga karaan nga sakyanan kon ang mga tag-iya wala na’y tinguha nga mopaayo niini.

* * *

Tungod sa tinguha sa ubang tawo nga gusto g’yud nila nga ilambigit si Mayor Tomas Osmeña sa pagpatay ni Ermita Barangay Captain Imok Rupinta, hayan nga makalingkawas na hinoon unya ang tinuod nga mastermind.

Duna man gyuy mga tawo nga tungod sa politika, gusto gyud nila nga ilambigit si Mayor Osmeña sa mao nga krimen. Hinuktuki kuno ninyo og maayo kining duha ka punto.

Si Mayor Osmeña kontra lang ni Rupinta tungod sa politika. Sa politika, dili gyud dulot sa bukog ang panagdumot. Mahimo ra nga sila magkauli paglabay sa katuigan.

Apan diay tawo nga nasakripisyo pag-ayo ug naalkanse tungod sa paggukod ni Rupinta sa ilegal nila nga kalihukan, sama sa pagpayuhot og ilegal nga drugas ingon man video karera ug moli-moli.

Ngano man gyud nga duna may mga tawo nga mosalikway na lang sa posibilidad nga si Rupinta gipapatay sa drug lord ug gambling lord diha sa Ermita?

Gisulti ko kini, dili kay pagdapig ni Mayor Osmeña, kay ang mayor dili man gani motagad nako isip iyang higala.

Ang pagtagad ni Mayor Osmeña kanako isip ra gyud sakop sa media  nga usahay mo-interview kaniya. Kon mag-abot mi sa usa ka kalihukan, dili gani mopahiyom ang mayor kanako.

Apan dili kini igo nga rason nga moapil na usab ako sa paghimo-himo og mga pamasangil, o kaha pagtanom og pagduda sa huna-huna sa katawhan, aron sila motuo nga si Mayor Osmeña nalambigit sa pagpatay ni Rupinta.