Mga bata gihimo nga guinea pig

Nabutang sa dakong peligro ang kinabuhi sa mga bata nga natusokan og Dongvaxia vaccine o bakuna batok sa dengue.

Gawas sa P3.5 billion nga nagamit sa gobiyerno alang sa programa, mas makapaalarma ang sitwasyon sa mokapin 700,000 ka bata nga nagpangedaron og nuybe hangtud sa 14 anyos nga nabakunahan.

Gipahibalo mismo sa manufacturer sa Dengvaxia vaccine nga mas makapasamot kadelikado ang bakuna sa mga bata nga wala pa masakit og dengue, sanglit sa higayon nga matakboyan kini sa virus makaangkon ang bata og severe dengue.

Sa sinugdanan, abi lang nako og fake news kining maong balita, apan tinuod gyud diay kay mismo ang Department of Health (DOH) maoy mipahunong sa vaccination.

Dili matukib ang kabalaka karon sa mga ginikanan gumikan sa nag-ung-ong nga peligro sa kinabuhi sa ilang mga anak.

Pastilan, tira pasagad ra man intawon ang Department of Health sa pagpatuman sa programa bisan dili pa diay segurado nga luwas gamiton ang mao nga vaccine.

Gihimo ra man intawon nila nga mura’g guinea pig ang mga bata kinsa subject sa ilang eksperimento.

Ang guinea pig maoy sagad gamiton sa mga eksperto sa ilang nadiskobre nga medisina, usa pa kini gamiton ngadto sa tawo.

Gawas sa imbestigasyon, angayan nga pangandaman daan karon ang dakong krisis nga posibleng mahitabo resulta sa kadanghag sa mga ahensya nga gisaligan unta sa pagproteher sa kinabuhi sa katawhan.