Pag-dissolve sa kaminyuon

Anaa karon nag-ung-ong sa House of Representatives ang House Bill 6027 nga gipasaka ni Speaker Pantaleon Alvarez nga mag-dissolve sa kaminyuon. Matud ni Msgr. Raul Go, head sa Cebu Archdiocese Matrimonial Tribunal nga ang maong balaudnon “will destroy the essence of marriage.”

Mawala na’y bili ang kaminyuon ug mawagtang na ang pagka-sagrado niini, ug mahimo na lang unya kining kaduladulaan, magminyo kunohay, nga imbes moingon nga mag-inunongay, “till death do us part, until further notice” na. Mao’y gidangat!

Tinuod, sa atong nasayran ug naandan, sumala sa Bibliya (kana kon motuo ka’g Bibliya), ang kaminyuon gitukod mismo ni Jesus (kon motuo ka man sa pagka-Dios ni Jesus), nga kini magmalungtaron, and “let no man put  asunder.”

Maayo man gani kay pipila sa atong mga tinugyanan sa Lower House, misupak ning maong balaudnon. Hinoon, kon mobotar sila sa ilang pagka-partidista, ug dili ipasikad sa ilang personal nga conviction and belief, lagmit molusot ang maong balaudnon. Ug kon mahimo na kining balaod, goodbye sanctity of marriage. Ug unsa kaha intawon ang mahitabo sa mga anak?

* * *

Matag gamit nimo sa mga sakyanan sa gobiyerno, ma-opisyal ka man, o ma-ordinary employee, gikinahanglan ang trip ticket, isuwat dinhi ang ngalan sa mogamit sa sakyanan, asa paingon, official ba ang lakaw, ug pila ka litro sa gasolina o krudo ang sulod sa tangke. Dinhi makwenta ang gilay-on sa padulngan sa nagsakay.

Sa ato pa, lisud ang paglipatlipat. Sa among panahon, dili mi kapasakay sa mga sakop sa pamilya, paghatod-kuha, pananglitan sa mga anak ngadto ug gikan sa eskwelahan, pagpangompra, ug pagpanguyab.

Unya, kon magabhian, kinahanglan mo-eksplikar mi nganong nagabhian. Usa gani ka higayon, nadakpan mi sa taga-COA gumikan sa kapakyas pagpa-isyu og trip ticket. Ilabina panahon sa martial law, estrikto kaayo ang paggamit sa mga For Official Use Only nga mga sakyanan.

Karon, unsa man? Mao ra man og bisa’g unsang orasa, even after office hours, ug bisa’g asa nato makit-an ang mga sakyanan sa gobiyerno. Official ba kaha ang mga lakaw niini?

Anyway, dako ang atong katingala nga gawas nga dunay mga fake news, duna sab diay fake trip tickets. Matud pa, gihimo kini sa mga basurero, mga garbage loaders sa usa ka barangay ning dakbayan.

Pagka-bright gyud natong mga Pinoy uy! Bisa’g unsa na lang ang mahunahunaan. Bisan ang trip ticket sa mga garbage trucks, atong i-fake. Pastilan!

Kon tinuod man, wala mahibawo niini ang kapitan sa nahisgutang barangay?