Love and cash on Christmas

Kon ang uban pa ang pasultihon, mas pilion nila ang pagsaulog sa Pasko kay sa birthday, tungod kay sa Pasko, mobalik kuno ang mga memories sa pagkabata, samtang ang birthday magpahinumdom kuno kini sa edad nga padulong na nga matigulang.

Nagpakita lang kini nga ang pasko alang sa mga bata nga excited kaayo sa mga madawat nilang pinaskohan gikan sa ilang mga ginikanan ug sa ilang mga maninay ug maninoy, nga maglikaylikay usahay.

Naghisgot na man lang gyud ta og pinaskohan, alang sa mga wala pa makapamalit og regalo nga ipanghatag ngadto sa mga kinugos, may daghan na nga kapilian kon asa makapalit og mga pangregalo.

Kon mga bata ang pabut-on, mas ganahan sila og mga dulaan, busa ato na lang sila nga paundayonan kay Pasko man.

Apan pahimangno lang mga ninong ug ninang, seguradoha nga luwas gikan sa peligro ang mga dulaan nga inyong pamaliton alang sa inyong mga kinugos. Daghan lagi nga mapalit nga mga baratong dulaan, bisan asa, apan basin og taas kaayo kini og toxic chemical content.

Samtang alang sa mga ginikanan ug sa mga magtutudlo, pahinumdoman gyud nato ang mga bata sa kadelikado sa paggamit sa mga firecrackers.

Lakip niini ang watusi. Dili man tuod makasamad, apan makamatay kon makaon sa mga bata. Kinahanglan nga human og gunit sa watusi, manghunaw gyud dayon.  Mura’g gubaon nga plaka kita nga magbalikbalik sa pagpahimangno, apan sige lang, basta mapahinumdoman lang ang atong kaigsoonan. Seguradohon nato nga ang pasko kasaulogan sa kalipay ug dili sa pagmahay.

Dili lang mga material nga butang ang atong ihatag, kon dili, mas labing importante ang gugma ug pagpakabana sa kaluwasan natong tanan.

Give love on Christmas, pwede ra sad pakapinan og cash.