Illegal gambling midagsang gyud

Nakadawat ko og report nga midagsang pag-ayo ang illegal gambling machines diha sa dakbayan sa Talisay. Matud sa akong inpormer nga nagpahibawo kanako nga mga “lambay” kuno ang logo sa mga video karera.

Kinsa ba ang hepe karon sa dakbayan sa Talisay? Ipasusi kuno kini sa imong mga sakop Sir, kon unsa katinuod ang report nga akong nadawat. Kon wala pa ko malimot, mga buaya man kadto ang logo sa mga karera ug moli-moli nga midagsang sa Talisay.

* * *

Nakadawat ko og report nga diha sa Sitio Caduloy sa Barangay Tisa, dunay gi-operate nga mga video karera, unya kusog sab kuno ang pagpamaligya og shabu diha nga dapita. Awhagon nako ang mga polis nga susiha kuno diha dapit sa ilang George, kay matud sa akong inpormer, anaa diha dapit ang mga video karera.

Kini ra ba kunong mga nag-operate og video karera ug moli-moli diha sa Sitio Caduloy sa Tisa, ang kuryente nga ilang gigamit gikuha direkta gikan sa poste sa VECO, sa ato pa, ang mga silingan diha maoy nagbayad!

Gipahibalo nako dayon niini si Kapitan Philip Zafra, ug taud-taod, giteksan ko sa higala nakong kapitan nga nakuha na nila ang video karera. Ang akong inpormer, miingon nga daghan pa diay gyud. Misaad ang inpormer nga hatagan ko niya sa ngalan sa tag-iya sa kabalayan nga may gambling machines.

Bahin sa shabu, aw nakasabot ta nga PDEA gyud ang angay’ng moaksiyon, apan sila sa barangay mohatag gyud og kasayuran, dili kay magpakahilom lang.

Kining bahin sa pagpamaligya og shabu, itugyan ko kini sa atong kapolisan aron maaksiyonan ni Senior Supt. Joel Doria, ang direktor sa Cebu City Police Office, pinaagi sa pakigtambayayong sa PDEA. Dia sa’y reklamo kabahin sa misiaw nga illegal swertres dapit diha sa San Roque, Mambaling padulong kuno sa University of Cebu, unya ang mga video karera ug moli-moli anaa sa likud sa kamansi.

Nasuko kaayo ang inpormer kay pwerteng sabaa gyud kuno panahon sa gabii. Gawas pa kuno, ang ilang mga bana usik-usikan lang ang kinitaan sa pagduwa og video karera.

* * *

Unya, hangtud karon ang kapolisan sa Lapu-Lapu wala pa gyud makaaksiyon sa reklamo sa pipila ka lumolupyo sa Barangay Basak. Mireklamo sila kay usa kuno sa ilang mga opisyal sa barangay nangunay man hinoon sa pag-operate og illegal swertres.

Unsa man mo nga mga polis diha sa Lapu-Lapu, hinay gyud mo og intelligence network? Lihoka ninyo ni aron mapitol kining salbahis nga opisyal sa barangay. Imbes magsilbe unta nga ehemplo sa katawhan, siya hinoon ang magpasunod og binuang!