Ang kurapsyon ug Konstitusyon

Gipamulong ni Presidente Rodrigo Duterte ang pag-usab sa atong Konstitusyon aron maghaw-as sa katawhan sa kakabus ug magwagtang sa kurapsyon.

Inighuman unya kuno niya sa paghimo niini, mokanaog na siya sa katungdanan, bisan og dili pa mahuman ang iyang termino.

Ang pag-usab sa Konstitusyon dili na kuno kini ipaagi pa og convention o asembliya tungod kay ang katawhan na ang mohimo niini.

Kon unsaon pag-usab sa katawhan sa Konstitusyon, wala kini idetalye sa presidente. Segun sa akong nahibaw-an, adunay tulo ka paagi unsaon pag-amendar o pag-usab ang Konstitusyon.

Ang una, pinaagi sa Constituent Assembly diin ang mga kongresista ug mga senador mag-usa sa ilang tigum ug sa boto nga 3/4 usbon ang Batakang Balaod.

Ang ikaduha, pinaagi sa Constitutional Convention diin ang Kongreso, sa boto nga (2/3) mopatawag og Constitutional Convention nga pagalangkoban sa mga pinili o tinudlo nga mga delegado aron maoy mousab sa Konstitusyon.

Ang ikatulo, pinaagi sa People’s Initiative diin sa 12% nga pirma sa tanang botante sa tibuok Pilipinas, usbon ang Konstitusyon. Sa kinatibuk-ang 12% nga pirma, kinahanglan usab nga ang tanang distrito may 3% nga pirma sa mga lumolupyo niini.  

Sa People’s Initiative gikinahanglan nga ang sugyot nga kausaban sa Konstitusyon nakasukip na sa gipirmahang petisyon aron sa pagmatuod nga nabasa ug nauyonan kini sa mga mipirma niini.

Ang pag-usab sa Batakang Balaod nga wala malakip niining tulo ka pamaagi nga akong nahisgotan, maisip nga wala itugot o ilegal. Usbon ang Konstitusyon aron mahaw-as ang katawhan sa kakabus ug masulbad ang kurapsyon?

Pagkaluoy sa Konstitusyon o Batakang Balaod. Siya ang gipasanginlan sa kakabus ug kurapsyon. Gihimong “scapegoat” sa mga politiko ang Konstitusyon.

Gisulti ko na kini kaniadto ug karon ako na pud nga usbon. Bisan pa kon ang Ginoo maoy maghimo sa Konstitusyon, apan kon ang magpatuman niini mao ra gihapon, ang kakabus ug kurapsyon magpabilin ra gihapon.