Abusado wala’y luna sa gobiyerno

Usa ka sakop sa City of Lapu-Lapu Allied Force (CLAF) ang gipatangtang sa serbisyo ni Mayor Paz Radaza human nakuhaan og video nga isog kaayong nanuktok sa bintana sa taxi ug mikatap usab sa social media.

Makita sa video ang lalaki nga nagsul-ob og ID sa CLAF kinsa isog kaayo nga misita sa taxi driver. Kon ang video lang ang atong basehan makaingon kita nga arogante ang naasoy’ng lalaki, apan lahi ra kon masayran nato unsa ang hinungdan sa iyang kasuko.

Matud sa naasoy’ng lalaki nga naglagot siya sa taxi driver tungod kay hapit nasaghiran ang iyang gimaneho nga motor diin angkas niya ang iyang manghud. Kusog kuno kaayo mipadagan ang taxi driver maong iyang gigukod ug gikomprontasi.

Gitug-an sa CLAF member nga nibalik sa iyang panumdoman ang nahitabo kaniadto sa iyang mama nga nadisgrasya tungod sa abusadong taxi driver.

May sayop usab ang taxi driver kon basehan nato ang pamahayag sa CLAF member. Ngano nga wala man mogawas ang driver sa taxi aron unta matin-aw ang isyu? Basin nahadlok ang driver o basin guilty siya sa iyang reckless driving?

Puwera sa maayo, duna gyuy mga taxi driver nga nagtuo, nga sila ang hari sa karsada ug wala’y pakialam sa ubang motorista.

Makasabot man kita sa reaksyon sa CLAF member nga nangisog tungod kay nadala siya sa iyang emotion, apan dili kini igo nga rason nga mangaway na ka sa ubang tawo. Ilabi na nga nagsul-ob siya og ID sa gobiyerno nga maoy nakapainit sa isyu.

Nangayo na siya og pasaylo sa iyang gibuhat, apan mura og dili na kini mosaler sanglit miingon na man si Mayor Radaza nga walay luna sa gobiyerno ang mga tawong abusado.

Bitaw, angayan gyud ipatigbabaw ang kabugnaw sa ulo kon adunay panghitabo aron dili makahimo og butang nga imong kamahayan.