Nganong gipatay si Kapitan Imok?

Risgo gyud kaayo ang kinabuhi sa usa ka opisyal sa barangay kon motrabaho kini pagtuman sa iyang katungdanan. Mao kini ang nahitabo kang Ermita Barangay Captain Felicisimo “Imok” Rupinta.

Si Rupinta gibanhigan ug gipatay sa mga wala pa hiilhing tawo didto sa Barangay Tayud, Liloan kaniadtong Huwebes sa gabii. Dako ang akong pagtuo nga ang nagpatay kang Rupinta mao ang mga naapike sa iyang kampanya batok sa ilegal nga drugas ug illegal gambling machines.

Nahinumdom ba kamo niadtong hilabihan kadaghan nga video karera ug moli-moli, mura’g dul-an sa 80 kabuok, nga nasakmit diha sa iyang barangay sa milabay’ng tulo ka buwan?

Nahimo kadtong mao nga kalampusan sa kampanya sa illegal gambling diha sa Ermita tungod sa report ni Rupinta ngadto kang Senior Superintendent Joel Doria, ang direktor sa Cebu City Police Office (CCPO) nga mimando dayon sa iyang mga sakop nga aksiyonan kini dayon.

Tuod, paghatag ni Rupinta sa report ngadto sa kapolisan mga alas nueve sa buntag, pagka alas 12:15 sa udto, miabot na og 54 ka video karera ug moli-moli ang nasakmit. Pagkaugma, nadugangan pa gyud kay ang mga tanod gimandoan ni Rupinta nga ipadayon ang kampanya.

Gitug-anan ni Rupinta ang kapolisan kon kinsa ang duha ka tag-iya sa mga video karera nga gi-operate diha sa Ermita, ang usa kapitan sa barangay sa Borbon nga miangkong “hitman” ug napriso na gani kay ang balay nasakmitan og mga armas.

Ang laing tawo nga kasosyo sa kapitan pag-operate og illegal gambling machines ug giingon pa gani nga shabu, anaa pa nagtikaw-tikaw diha sa Ermita. Usa kini sa angay’ng tutokan sa mga imbestigador sa kapolisan.

* * *

Ang tinuod, human nga nasuspenso si Rupinta sa katungdanan, niaktibo na siya sa paghimo’g kampanya batok sa drugas ug illegal gambling.

Gani, ang PDEA, atol sa termino sa kanhi direktor, gihatagan na niya sa mga “drug personalities” diha sa Ermita. Tuod, nadakpan kadtong giila nga usa sa mga dagkong tigpayuhot og drugas sa barangay.

Tan-aw nako niini, ang nahitabo ni Rupinta makapasabot nga ang mga opisyal sa barangay magkiyugpos na lang g’yud ug maoy gamiton nga rason ang kahadlok nga mahisama sila sa kapitan sa Ermita.

Apan ang tinuod, kining mao nga mga opisyal sa barangay nga wala molihok sa kampanya batok sa ilegal nga drugas ug sugal sa ilang dapit kay nahimo na sila nga mga kasosyo, ug ang uban nagdawatan og mga suborno gikan sa mga tigpasiugda.