Fake og utok

Pagkadali na lang gyud sa paghimo og mga sayop nga estorya pinaagi sa social media karong panahona. Ang nakaparat kay mokuninit sab dayon ang mga netizens, bisan og tataw kaayo nga dili mao ang ilang nakita.

Sama sa usa ka post sa kontrobersyal nga social media site sa Sugbo mahitungod sa giingong pagpanapat sa security guard sa simbahan sa dakbayan sa Lapu-Lapu atol sa pista.

Nag-post kini nga gisumbag sa gwardiya ang babayeng candle vendor kay misulod sa simbahan.

Apan ang iyang video nga gi-upload nagpakita nga igo ra man gipakalma sa security guard ang babaye ug duna usay kuyog nga pari, wala magkatakdo ang estorya ug ang video niya.

Giulan dayon sa pagsaway, dili lang ang gwardiya, kon dili, apil na ang mga pari ug ang simbahan mismo.

Giestorya gyud nako ang security guard mahitungod sa isyu ug gipanghimakak niya ang pasangil.

Sumala niya nga dili candle vendor ang babaye nga gituohan nga adunay problema sa pangisip.

Misaka kuno kining babaye sa altar samtang nagwali ang pari niadtong bisperas sa pista sa Opon.

Gipalingkod kini sa mga gwardiya hangtud nga nahuman ang misa ug diha pa nila gialam-alaman sa pagpagawas, apan matud pa nag-wild kini ug gipamaak ang gwardiya ug gipatiran.

Giklaro sa security guard nga wala niya dapati ang babaye kay nasayod siya nga aduna kini sakit.

Gidasonan usab sa mga pari ang pamahayag sa gwardiya. Gipangayoan pa gani kuno ang pari og usa ka milyon sa babaye kay iplete pauli sa ilang balay.

Ako usab nga giestorya ang mga tigbaligya og kandila ug sila miingon nga wala sila makaila sa babaye kay dili man kini vendor ug wala usab sila makakita nga gidapatan sa gwardiya.

Pastilan, dili na gyud mabangbang ang paghimo og fake news kay daghan na man usab ang motuo niining mao nga tigpasiugda sa fake report. Unsa may tawag niini kanila? Fake og utok!