EDITORYAL - Hulga sa terorismo

Makaalarma kining report nga subling nangrekrut ang Maute-ISIS og bag-ong puwersa didto sa tungatungang bahin sa Mindanao. Gituohan sa mga otoridad nga ang maong kalihokan posibleng may kalambigitan sa paglusad na usab nila og laing pagpangatake.

Sigurado nga usbon na sa mga terorista ang ilang pamaagi. Ang pag-atake og laing siyudad o ang paglusad og mga pagpamomba, gitumong aron magtisok kini og kalisang sa publiko ug mabawsan ang gobiyerno nga sa miaging bulan miguba sa ilang mga damgo nga makatukod og caliphate diha sa Mindanao.

Angay’ng magmatngon ang publiko niining maong mga kalihokan. Muslim man o Kristiyano, kinahanglang magkahiusa ug magtinabangay alang sa seguridad sa usa’g-usa. Nakita didto sa Marawi City ang kabangis sa maong grupo dihang wala sila’y pili nga mipatay og mga Kristiyano ug mga Muslim nga ilang giingong wala magsunod sa pagtulon-an sa Islam.

Bugtong mahimo sa katawhan mao lang ang pagdoble sa pagbantay sa ilang palibot ug pagpaniid sa mga tawong bag-o pa nga niabot sa ilang mga dapit ug bantayan ang ilang mga kalihokan. Ang terorismo dili na karon basta-bastang mawala, hangtud nga daghan pa gihapong kabataan nga wala matarong pag-edukar, magpadayon kini hangtud sa hangtud.

Angay nga protektahan ang kabataan nga mao karon ang target sa grupo nga hayloon gamit ang kuwarta aron nga mosulod sila sa ilang grupo. Tingali, dili maglisud og rekrut og bag-ong miyembro ang grupo gikan mismo sa mga kabanay sa gibanabanang usa ka libong Maute-ISIS fighters nga nakalas didto sa Marawi City.

Apan sa mga hilit nga dapit nga wala gyud maabot sa serbisyo sa gobiyerno, dili layo ang posibilidad nga hasta ang ilang kabataan didto, mahaylo gyud. Dako kaayo og papel ang mga opisyal ug lider sa katilingban, elected man o mga tinudlo, nga pasabton nila ang ilang mga sakop kabahin sa daotang katuyoan sa grupo sa mga terorista.