Dupa sa Angkas

Lisud sabton kining padayon nga pagdupa ni Cebu City Mayor Tomas Osmeña sa mga habal-habal niining dakbayan. Kini bisan pa man sa hagbay ra nga warning mahitungod sa kadelikado gayud sa operasyon niining mao nga klase sa transportasyon sa sentro sa siyudad tungod lagi sa disgrasya.

Karon nakakita og paagi ang mayor human nga gideklara sa Land Transportation Franchising and Regulatory Board nga ilegal gayud ang operasyon sa Angkas sa nasud. Gusto ni Osmeña nga kuhaon ang serbisyo sa Angkas aron kuno nga makatabang ang dakbayan sa mga drayber sa habal-habal.

Matud ni Osmeña nga daghan kuno nga mga estudyante ug mga trabahante sa call center niining dakbayan ang nasagmuyo sa pag-cancel sa operasyon sa Angkas. Gusto kuno sila og katin-awan tungod kay nakaapekto kuno kini sa ilang pag-commute matag adlaw.

Sa iya nga lakang, kuhaon sa kagamhanan sa dakbayan ang serbisyo sa Angkas gumikan lagi sa dako nga clamor sa katawhan kinsa nanginahanglan sa operasyon sa mga habal-habal. Apan wala pa’y klaro kon kanus-a o unsa nga kasabotan ang kab-oton sa siyudad ug Angkas.

Bisan ako naglibog kon unsa gayud ang birtud niining mga habal-habal nga pwerte man g’yud nga nakapanalipud ni Osmeña sa operasyon niini dinhi sa dakbayan.

Kini bisan pa man kon nasayod gayud siya sa dako nga risgo niini sa mga pasahero sa biyahe niini sa huot na nga kadalanan sa dakbayan.

Dili ba nga kadaghanan sa mga aksidente sa kadalanan sa siyudad ug sa tibuok nasud karon naglambigit man sa mga motorsiklo? Kini naggumikan usab sa pagkawala’y disiplina sa mga drayber nga paturagas lang sa ilang pagmaneho taliwala sa paghuot sa dalan.

Bisan pa sa pagka ilegal sa operasyon sa habal-habal, padayon gihapon ang ilang pagbahas sa kadalanan sa sentro sa siyudad.

Nag-anad lagi kining mga drayber gumikan kay suportado lagi sila sa lokal nga kagamhanan.

Hinuon wala man siguro’y mosupak kon adto sila mamasada sa bukid diin kulang gayud og public transport.

Usa ra’y akong nakita nga rason ngano nga miunong gayud si Osmeña niining mga habal-habal sa dakbayan.

Ug kini tungod sa politika. Nasayod kita nga dako unya og ikatabang kining mga drayber sa habal-habal inig-abot na unya sa eleksiyon. Ato na lang nga atangan.