Ang tubig sa okra

Gikan sa ‘Healthy Food Advice’, maoy gikuhaan nato og ideya mahitungod sa benepisyo nga makuha sa tanom nga okra, partikular na sa tubig gikan sa presko nga okra. Maisip kini nga utanon, kay kumon man kini isagol sa sari-sari nga utan, chopsuey, ug uban nga lamian nga mga potahe.

Ang okra, mabuhi kini nga mobunga nga wa’y gipiling panahon sa tibuok tuig, mao nga kumon ni makita sa mga merkado o groserya. Mahimo ni konsumohon nga lapwaan lang, o himuon nga ‘pickled o uban pa. Sa mga nakasulay na sa ka-epektibo sa mahatag nga benepisyo sa okra, gihimoan kini’g presentasyon.

Mopaus-os sa lebel sa kolesterol, pagsanta sa diabetes, mopaus-os sa ‘glucose o bloodsugar level, mopahupay sa sintomas sa hubak o mopaluag sa pagginhawa, mosanta o mopaalibyo sa kidney, mosanta batok sa kolon kanser, pahilis sa kinaon, pakalma sa depresyon, mohatag og enerhiya sa tibuok adlaw, mopamenos sa implamasyon sa baga, ulser ug uban pa.

Ang okra, menos sa kaloriya, dasok sa nutrens, luwas ug wa’y say’d-epek, wa’y kolesterol o saturated fats. Tinubdan kini sa taas nga ‘fiber’, mga bitamina, minerales ug ‘antioxidants’.

Unsa may gikinahanglan? – magkuha og upat ka buok nga kasarangan ang gidak-on sa okra, hugasan og maayo sa  inadlaw/bugnaw nga tubig.

Unsaon ang pagpreparar? – kuhai o abisa ang pungangohan, o ang ibabaw nga bahin sa okra. Hiwaon kini nga pataas, inighuman ibutang sa garapon nga may sulod nga tubig. Pabuntagan nga humolan ug inigkabuntag pug-an sa tubig ang okra nga isulod sa tasa. Unya dugangan og tubig nga masakto nga usa ka tasa.

Unsaon ang paggamit – inigbangon nga 30 minutos sa dili pa mamahaw, moinom una sa gipreparar nga tubig sa okra. Masinati mo ang daling epekto niini.