Clamping padayon

Naagian nako kagahapon sa buntag ang mga sakop sa CITOM nga ni-clamp sa daghang sakyanan nga giparking daplin sa Veterans Drive, kanang karsada nga tungason paingon sa Marco Polo Hotel sa Lahug.

Lapad ang maong karsada ug wala makamugna og trapik ang pagparking sa maong mga sakyanan, apan tuyo tingali sa mga traffic enforcers nga dili gayud parkingan ang karsada. Nindot man sab.

Apan mas nindot g’yud kon paspasan sa mga traffic enforcers ang pag-clamp sa mga sakyanan nga anha ra sa karsada i-parking gikan sa gabii hangtud na sa buntag.

Kon panahon sa adlaw, mas nindot nga unahon sa mga traffic enforcers ang pag-clamp sa mga sakyanan nga gipang-parking didto sa mga gagmay ug sudlonon nga karsada, kadtong karsada nga kanunay’ng makasinati og trapik.

Ambot ngano g’yud nga daghan man kaayo ang gusto nga mamalit og sakyanan bisan kon wala sila’y kaparkingan. Ang uban ra ba, wala g’yuy kaikog nga ang ilang pagparking makahasol na sa ubang motorista.

Lipay lang gani ko kay diri sa GMA Road, gi-request g’yud ni Super Bobby Nalzaro ngadto sa CITOM nga i-clamp ang mga sakyanan nga ang karsada ra maoy gihimong grahe sa ilang mga tag-iya.

Ingon niana ang inyong buhaton, giyahi ninyo ang CITOM kon asa ang ubang dapit nga adunay mga sakyanan nga nakahasol kaayo sa pag-agi sa mga motorista.

Apan may request sa akong higala bahin sa mga sakyanan nga anaa usab mamarking sa karsada dapit sa Inayawan, may sketch na man unta ang CITOM, apan wala man kuno gihapon aksyoni.

Nasayod na usab sila nga ang mga nagpuyo sa likud sa karaang provincial jail sa M.J. Cuenco Avenue nagreklamo sa mga sakyanan nga anaa sa karsada giparking panahon sa gabii, apan wala pa gihapon matagad.

Atensyon sa mga strike force sa CITOM nga sila si Bimboy Arnaiz ug Efren Navales, palihug niini mga sir.

* * *

Nagtuo ko nga mokalma ang LTFRB sa paghimo’g kampanya batok sa mga driver og motor nga sakop sa Angkas, karon nga gitataw ni Mayor Tomas Osmeña nga motabang siya sa maong mga driver. 

Ambot bitaw sab ning LTFRB nga ang Angkas, gukdon man nila, nga arang-arang na man lang kini kay sa ordinaryong habal-habal. Wala man gani sila makagukod sa mga tagdumala og kolurum, ang Angkas na hinoon ang gidaginot.

Nagtuo ko nga kay suod man si Mayor Osmeña ug LTFRB regional director Ahmed Cuizon, mokalma na ang LTFRB dinhi sa Sugbo paggukod sa mga sakop sa Angkas. “Anong say” mo sir Ahmed?