Pagpangulitawo sa militar
Nisubli pagpasidaan si Presidente Rodrigo Duterte sa pagdeklarar og revolutionary government kon magpadayon ang iyang mga kaatbang pagpasiugda og kaguliyang.
Apan ning higayona, giklaro na niya unsay giisip nga kaguliyang- kon magbitbit na og mga armas ang mga magprotesta sa kadalanan batok sa iyang pamunoan.
Mao ni ang unang higayon nga iyang gibanhaw ang hulga human nga nideklarar sila si Defense Secretary Delfin Lorenzana ug Armed Forces Chief Rey Leonardo Guerrero nga dili sila mopaluyo sa revolutionary government ug ubang mga hulga sa demokratikanhon nga mga institusyon nga gipanalipdan sa 1987 Constitution.
* * *
Si Bise Presidente Leni Robredo ang nipahibawo sa baruganan nila ni Lorenzana ug Guerrero human sa iyang gitambongan nga briefing sa militar niadtong Nobiyembre 8 mahitungod sa rehabilitation sa Marawi City.
Dose ka adlaw na human sa pahibawo ni Robredo, wa’y panghimakak nga giluwatan sila si Lorenzana ug Guerrero ug ilang mga tigpamaba.
Supak ba g’yud ang militar sa revolutionary government? Mao ba ni ang nakapahilom sa hulga ni Presidente Duterte sa pipila ka adlaw? Nganong gibanhaw na man sab ang hulga sa iyang pag-atubang sa media sa Davao City niadtong Sabado?
* * *
Bugtong reaksyon ni Duterte sa kontrobersiya, wa kini mohimakak sa pagkutlo ni Robredo nila ni Lorenzana ug Guerrero. Gani, gidasonan niya nga supak ang militar sa dihang iyang gisugyot ang revolutionary government.
Apan kadudahan ang iyang kamatinud-anon kay gisumpayan og pasiaw nga dili na lang siya modayon pagdeklarar og revolutionary government kay mas ganahan man ang militar nga mosunod ni Robredo, kinsa gawas nga guwapa, dili pa g’yud mamalikas sama niya.
* * *
Sa iyang pagduaw sa Sugbo sa niaging semana, nitug-an si House Speaker Pantaleon Alvarez sa Arangkada sa DYAB Abante Pa, Bisaya! nga mora og dili tinuod nga supak sila si Lorenzana ug Guerrero sa revolutionary government.
Sa wa’y paghatag og detalye, nipadayag og pagsalig si Alvarez nga suportahan sa kasundalohan ang bisan unsang lakang ni Presidente Duterte. Nagpadayon ba ang mga paningkamot sa pagkuha sa hingpit nga suporta sa militar?
Kabahin ba ang pagdeklarar ni Presidente Duterte sa komunista nga New People’s Army (NPA) nga teroristang grupo ug ang pagsalikway niya sa lain pa nga mga hugna sa sabutsabot sa kalinaw uban sa National Democratic Front?
- Latest
