Curfew sa mga batan-on ipatuman sa pista

Katumanan ugmang adlawa sa pangilin sa Birhen sa Regla, ang patrona sa dakbayan sa Lapu-Lapu.

Apan karon pa lang, niining adlaw sa bisperas sa pista, hilabihan na kahuot sa mga sakyanan tungod sa mga karsada nga gipangsirad-an.

Sugod kaganinang alas kwatro sa kaadlawon, gisirad-an na ang mga karsada nga pasulod sa Barangay Poblacion nga maoy sentro sa relihiyosong kalihokan diin nahimutang ang simbahan.

Molanat ang road closure hangtud na ugma sa hapon, busa giawhag sa City Traffic Management System (CTMS) ang mga tawo sa pagpangita og mga dapit nga kaagian sa ilang mga sakyanan nga wala maapil sa gidili.

Dili usab magpataka sa pagparking sa mga sakyanan kay aron dili makabayad og dakong multa kon masakpan.

Gamay’ng pasensya ug penitensya alang sa mga deboto kinsa moadto ug mohalok sa Mahal nga Birhen sa Regla isip pagtuman sa panaad matag tuig.

Gipaniguro usab sa kapolisan ang kahapsay ug kalinaw sa kalihokan pinaagi sa pagpakatap og mga polis sa dapit nga hugpaan sa mga mamista. Ug pahinumdom sa mga batan-on ug sa mga ginikanan, timan-i nga higpit gihapon nga ipatuman sa city government ang curfew.

Nagpasabot kini nga dili makalaruylaroy ang mga menor de-edad paglapas na sa alas 10:30 sa gabii kon sila wala’y kauban nga mga hamtong, panghiposon sila sa lawom na nga kagabhion ngadto na sa kaadlawon.

Gitumong kini aron malikay ang mga batan-on sa kadaot nga posibleng ilang masugatan. Aron dili maproblema, motuman na lang g’yud sa lagda sa lokal nga kagamhanan.

Happy Fiesta dakbayan sa Lapu-Lapu! Viva Birhen sa Regla!